- Artikelopsies
- Deel
- Kry Rapport op
Vir onsself het ons genade; nie vir gays
deur Jan Venter, Bloemfontein
2012-07-14 16:01
In die Bybel is daar talle teksverse wat ons noop om klippe te begin soek as ons ’n homoseksuele medeburger teëkom (soos aan ons opgedra in Lev. 18:22, 20:13 en etlike ander tekste).
Maar voordat ons die eerste klip optel, laat ons gerus eers ’n bietjie verder lees:
Eks. 35:2: “… Elkeen wat op dié (Sabbat-) dag werk, moet doodgemaak word.”
Lev. 7:23: “… Julle mag geen vet van beeste, skape en bokke eet nie.”
Lev. 19:27-28: “Julle mag nie… die hare voor die ore en die wangbaard knip nie.”
Lev. 11:2-8: “Julle mag nie die vleis van … die kameel, dassie, haas of vark eet … of selfs aan hulle karkasse raak nie.”
Lev. 12:2: “Wanneer ’n vrou ’n seun in die wêreld bring, is sy … onrein.”
Lev. 20:10: “Iemand wat egbreuk pleeg met die vrou van ’n medeburger, moet doodgemaak word.”
Daar is talle ander soortgelyke ondubbelsinnige opdragte.
Volgens statistieke beteken dit ongeveer 10% van die bevolking moet weens hul homoseksuele neigings uitgewis word, ’n verdere 41% weens egbreuk en ek skat nog 95% wat op die Sabbat “houtjies optel” (of kosmaak).
Dan is daar nog al die ander “gruweldade” waarvoor oortreders ook “uit die gemeenskap verwyder moet word”.
Daar gaan waaragtig niks van ons ou volkie oorbly as ons al hierdie Bybelse opdragte letterlik toepas nie. Dan praat ek nog nie eens van ons stout seuns wat ons buite die stadspoorte moet gaan stenig, of ons dogters van wie ons gelukkig winsgewend ontslae kan raak deur hulle in ooreenstemming met Eks. 21:7 as slavinne te verkoop nie.
Laat ons dus liewer eers noukeurig introspeksie doen voordat ons begin argumente versamel waarmee ons die arme homoseksuele “veroordeeldes” wil verdoem.
Ek glo hulle verdien net soveel begenadiging as wat ons, as klipgooiers wat self een of meer van hierdie wette oortree, onsself toe-eien.