- Artikelopsies
- Deel
- Kry Rapport op
Vrylating van tronkvoëls ondermyn reg
deur Rex de Koning, Gouritsmond
2012-05-05 15:19
Die voorbladberig van Rapport van 29 April met die aankondiging dat duisende gevangenes gouer vrygelaat word, is ontstellend. Méér ontstellend omdat oorvol tronke kwansuis ook daarby baat sal vind.
Glo pres. Jacob Zuma dat die burgerlike samelewing, wat gebuk gaan onder toenemende misdaad, ook by sy besluit sal baat vind?
’n Belangrike komponent by die oplegging van straf is dat dit as afskrikmiddel moet dien. Swak funksionering van die regstelsel sal ’n bydraende faktor by misdaad wees indien misdadigers nie vir hul dade boet nie. Dit misken ook slagoffers se regte.
Die enigste begenadiging wat geregverdig kan word, is dié van jeugdiges in die tronke. Selfs húl vrylating moet met omsigtigheid geskied.
Ingevolge art. 12 van die Grondwet het elke Suid-Afrikaner die reg op persoonlike vryheid en veiligheid. Dit sluit in die reg op vryheid van alle vorme van geweld: Die staat is verantwoordelik daarvoor om die gemeenskap teen misdaad te beskerm.
Dié reg op vryheid en veiligheid word baie hoog aangeslaan. Indien dié vryheid ontneem word en die staat versuim om oortreders te straf, bly hy in gebreke om mense behoorlik te beskerm en word die Grondwet misken.
Pres. Zuma se besluit verpolitiseer en ondermyn die regstelsel.