- Artikelopsies
- Deel
- Kry Rapport op
Weg met tradisionele leiers!
deur P.S. Swart, Waterkloof
2012-09-29 22:19
Koning Goodwill Zwelithini se versoek vir bykomende miljoene rande bo en
behalwe die R52 miljoen belastingbetalersgeld wat hy jaarliks ontvang,
het nou weer die aandag op tradisionele leiers geplaas.
Albert Mncwango, ’n woordvoerder van Zwelithini, beskuldig Phathekile Holomisa van rassisme omdat hy ander tradisionele “konings” se behandeling deur die regering durf vergelyk met dié van Zwelithini, wat dan kwansuis kan spog met ’n “suiwerder bloedlyn”.
Praat van die pot wat die ketel verwyt!
Wat bedoel hy met ’n “suiwerder bloedlyn”?
Bedoel hy dat die Zoeloes beter is as ons wat aan ander bevolkingsgroepe behoort?
Is party groepe dan “meer gelyk” as ander?
Ek kan nie die nut vir enige tradisionele leier sien nie en kan daarom nie sien waarom belastingbetalersgeld na hulle moet gaan nie.
Indien die Zoeloes of Vendas of enige ander bevolkingsgroep ’n tradisionele leier wil hê, is dit goed so, maar dan moet die groep wat die leier wil hê self betaal daarvoor en nie my belastinggeld nie. Ek kry geen voordeel uit ’n tradisionele leier nie.
Die probleem is egter dat geen politieke party, aan regeringskant of in die opposisie, ooit vir die afskaffing van tradisionele leiers sal propageer nie uit vrees vir moontlike stemme wat hulle mag inboet.
Die belastingbetaler trek weer aan die kortste end.
Sal ’n inisiatief om tradisionele leiers afgeskaf te kry enige kans op sukses hê?
Kom ons probeer!