- Artikelopsies
- Deel
- Kry Rapport op
Witwarm woede oor moord
deur Dr. Johann Broodryk, Waterkloof
2012-12-02 00:19
My broer se 26-jarige seun is verlede week vermoor. In die nag, met vier skote. Waarskynlik vir ’n selfoon.
Die skok vir die familie en vriende is onmeetbaar enorm.
So iets gebeur mos net met ander mense. My broer had geen woorde, geen trane.
Dan herinner jy jou aan die talle sinlose moorde wat ander mense vanjaar getref het en ervaar mens ’n emosionele empatie met die naasbestaandes van ander moordslagoffers in hul verslaenheid en hartseer.
Ook ’n gees van solidariteit.
Wat het van menslikheid (ubuntu) geword? Hoe kan ons medemenslikheid en orde herstel?
Is die enigste uitweg as reaksie teen moordenaars verskerpte aggressie en geweld?
Die inwoners van die betrokke veiligheidskompleks wat ure daarna die moordtoneel besoek het, het genoem van vroeëre pogings tot inbraak in die kompleks. Sommige het die skote gehoor, maar was versigtig om dadelik ondersoek te gaan instel.
Daar was een emosie wat onderliggend aan hierdie stille verslaenheid aanvoelbaar was. In die Afrikaanse taal kan dit opgesom word in twee woorde: witwarm woede.