- Artikelopsies
- Deel
- Kry Rapport op
Zuma-vlugte skok nie eens nie
deur Robert Nel, Strand
2012-01-28 13:35
Die illustrasie op die voorblad van Rapport (22 Januarie) ter stawing van die drie bykomende vlugte wat pres. Jacob Zuma se Inkwazi vergesel het, het die meeste lesers seker nie eens geskok nie.
Die Suid-Afrikaanse bevolking is al so gewoond aan die geld-verkwisting dat enige bedrag onder R100?miljoen ’n welkome bonus is.
Daar is seker beter ingeligte lesers as ek wat sal weet of die Amerikaanse president, Barack Obama, se Airforce One ook so onbetroubaar soos Inkwazi is.
Sover ek weet, is Obama ook die leier van die Westerse wêreld en glo ek sy nie-bywoning van ’n beraad sal meer gemis word as dié van ons president.
Die eerste minister van die Britte vlieg met hul plaaslike lugdiens en sal seker wat wou gee om ’n Inkwazi vir sy eie gebruik te hê.
Wat maak die president van ’n Afrikaland wie se geldeenheid sleg afsteek teen die ander twee menere se dollar en pond dan so spesiaal?
Blykbaar kan die kraan in Afrika nooit toegedraai word voordat die dam heeltemal droog is nie.
Dan kan die Westerse lande ons mos uithelp met ’n lening en as hulle weier, kan ons “rassiste” en “julle het ons land verkrag” skreeu.
Die gemiddelde ondersteuner van die regerende party is seker nie eens bewus van die totale apatie van ons regerende party nie, en sal maar weer vir die ANC stem.
Soos Simon & Garfunkel gesing het: “New York, New York, to that tall skyline I come.”
Hulle het net vergeet om by te sit, “In total luxury and squander...”