- Artikelopsies
- Deel
- Kry Rapport op
’n Tydbom ontplof; ander kan gou volg
deur Izak Bergh, Marchand
2012-11-17 23:20
Afrika het gedurende duisende rustige jare met min mense en gunstige omstandighede agter geraak met die ontwikkeling van tegnologie en die wetenskappe. Gevolglik het Afrika ook nie soos Europa ’n industriële revolusie gehad met oorbevolkte stede en politieke, ideologiese en sosiale omwentelinge wat gelei het tot bloedige revolusies en nog bloediger oorloë nie.
Dis dalk nou Afrika se tyd om dié groeipyne te beleef.
Die afgelope vyftig jaar sedert die verkryging van onafhanklikheid is Afrika se geskiedenis gekenmerk deur onrus, burgeroorloë, staatsgrepe, xenofobie en anargie.
Suid-Afrika beleef tans so ’n krisis met die gewelddadige stakings wat by die Lonmin-myn begin en na ander myne en die afgelope twee weke na plaaswerkers in die Boland versprei het.
Ons regering het die voordeel gehad om te kon leer uit die geskiedenis en om te kon sien watter toestande lei tot revolusie en anargie, maar hulle het nie voorheen nie en kan steeds nie dié voordeel benut nie.
Vir jare al word gewaarsku oor “tydbomme” soos miljoene werkloses, die duisende plakkerskampe om stede en dorpe, die miljoene armes wat instroom uit buurlande, asook wanbestuur deur korruptes en onbevoegdes, maar die regering het anderpad gekyk en lyk steeds onbeslis en rigtingloos.
Moontlik spruit hul onbeslistheid en onsekerheid daaruit dat die ANC-alliansie uit vennote met botsende ideologieë bestaan.
Wat die rede ook al mag wees, een ding is seker: Een van die tydbomme het ontplof en die res is aan die tik...