- Artikelopsies
- Deel
- Kry Rapport op
Forum: Hoe lyk dié gesondheidsplan vir jou?
deur die webredakteur
2011-08-11 08:52
Planne is op die tafel om vir SA ’n nasionale gesondheidsversekeringskema soos die Britse een in te stel.
Volgens prof. Albert Venter van die Universiteit van Johannesburg kos gesondheidsdienste in Suid-Afrika tans ongeveer 8,5% van die bruto nasionale produk en omtrent 48% gaan na private mediese dienste.
Dit dek omtrent 8 miljoen mense wat tot mediese fondse behoort. Die ander 42 miljoen van die bevolking kry net meer as die helfte van die mediese “koek” en die uitgawe is ongeveer R3 500 per kop – in vergelyking met die sowat R39 300 per kop in die VSA.
'n Nasionale gesondheidsversekeringstelsel sou ’n heffing van tussen 2% tot 4% op salarisse beteken – in die praktyk nóg ’n belasting. Econex meen dit sal ’n bykomende uitgawe van R165 miljard tot R240 miljard per jaar vir die staat beteken.
Dit is omtrent 29% van die huidige totale staatsbegroting, wat klaarblyklik onvolhoubaar is.
Die Suid-Afrikaanse Instituut vir Rasseverhoudinge (SAIRV) vrees ook dat 'n nasionale gesondheidsversekeringstelsel (NGV) die gehalte van die land se private gesondheidsorgsektor kan bedreig. Die staatsgesondheidsektor is in wanorde weens finansiële wanbestuur, sentralisering, swak algemene bestuur, voorraadtekorte, beperkte mediese navorsing en misdaad by hospitale.
Volgens mnr. Frans Cronjé, adjunk-uitvoerende hoof van die SAIRV, sal die land se armes meer daarby baat vind as die staatshospitale se bestuursprobleme opgelos word as by ’n NGV.
Verder het Antoinette Pienaar vroeër vanjaar in Beeld berig dat dit na raming tot R465 miljard per jaar kan kos sou daar
gepoog word om alle Suid-Afrikaners toegang te gee tot die gesondheidsorg
wat lede van mediese skemas kry.
Volgens Cronjé verdien slegs 11%
van Suid-Afrikaners ’n belasbare inkomste en in lande waar sulke
stelsels bestaan, verdien mense hoë netto-inkomste, is daar min
werkloosheid en betaal ’n groot aantal mense inkomstebelasting.
Die verslag toon net 8% van swart Suid-Afrikaners behoort aan mediese skemas teenoor 64% van wit mense.
Die
NGV-kwessie het vroeg verlede jaar gesorg vir groot omstredenheid nadat
’n dokument gelek het waaruit dit geblyk het almal sal gedwing word om
aan ’n NGV te behoort, maar slegs diegene met geld sal betaal.
Daar was ook uitlatings dat so ’n stelsel binne vyf jaar ingestel sou wees.
Die aanvanklike plan was ook dat geen dienste wat deur die NGV gedek sou word, privaat verseker kon word nie.
Die
private mediesefondsbedryf het bekommerd geraak oor hul voortbestaan en
hul lede het bekommerd geraak oor die gehalte van die sorg.
Sommige van die omstrede voorstelle is glo intussen laat vaar en die regering werk tans aan ’n witskrif vir die NGV.
- Vir die heel nuutste oor die NGV, lees hier.
Wat dink jy van dié planne? Behoort jy reeds aan 'n mediese fonds? Indien nie, dink jy jy sal baat vind by 'n nasionale gesondheidsversekeringskema?
Kom lewer gerus hier onder kommentaar.