- Artikelopsies
- Deel
- Kry Rapport op
Wat kos jou kind jou?
deur
2013-01-11 15:55
Het jy al ooit somme gemaak om uit te werk hoeveel jou kind jou regtig kos? Dit is maklik om te onthou hoeveel jy aan skoolgeld en doktersrekeninge bestee, maar het jy al ooit bymekaar gaan tel wat jy uitgee op ‘n koeldrank hier en daar, ‘n nuwe pet wanneer die oue (alweer) weggeraak het, sonbrandroom, ‘n R10 hier en daar vir die skool, ‘n nuwe potlood en talle ander klein dinge.
Rapport wil met lesers se hulp bereken wat mense se kinders hulle waarlik kos. Help ons asseblief! Boekstaaf waarop jy geld uitgee. Jy kan ook e-pos stuur na duurkinders@rapport.co.za
Riglyne vir ons Wat Jou Kind Jou Kos-opname:
Kom ons werk ‘n bietjie vir ‘n slag uit hoeveel ons op ons kinders uitgee. Nie omdat dit ‘n verskil gaan maak aan hoe lief ons vir hulle is nie, maar bloot om te weet hoe dit gebeur dat ons beursies so gou leeg raak.
Rapport wil met lesers se hulp oor ‘n tydperk van vier weke kyk hoeveel geld ouers aan hul kinders bestee. Ons gaan dit doen vanaf Maandag 14 Januarie tot Sondag 10 Februarie, sodat dit nuwe skoolklere en skoolbenodighede uitsluit.
Om dit makliker te maak, gaan ons net na die meetbare goed kyk. Ons gaan dus nie uitwerk hoeveel rande se petrol jy uitgee om jou kind na sy buitemuurse aktiwiteite rond te ry nie, maar ons gaan wel in berekening neem hoeveel daardie bedrywighede jou kos. Ons wil jou ook nie vra om uit te werk hoeveel kruideniersware jou kind opeet nie, maar wel om op te skryf wanneer jy vir hom spesifiek ‘n roomys of iets lekkers koop wanneer julle winkel toe gaan.
Hier is die vorm met afdelings waarin jy asseblief jou uitgawes moet opskryf. Die maklikste gaan wees om dit dadelik, alternatiewelik een keer per dag, op te skryf, en dan weekliks te e-pos na duurkinders@rapport.co.za.
Vorms is verkrygbaar by duurkinders@rapport.co.za.
Die inligting wat ons benodig is as volg:
Kind se naam en van, ouderdom, graad in skool, die voorstad/stad/dorp waar julle woon
Tipe uitgawe Bedrag per week, met enige kommentaar
Skoolgeld of creche
Nasorg/versorgers
Mediese fonds plus enige bybetalings, of indien privaat – mediese uitgawes
Sakgeld
Kosblik-kos
Snoepiegeld
Koeldrank, lekkers, roomys – los bederfies
Kosmetiekware/badkamerbenodighede/doeke
Babakos, indien van toepassing
Buitemuurse bedrywighede
Toerusting vir buitemuurse bedrywighede
Ekstra klasse
Bykomende skryfbehoeftes
Vermaak
Presente vir ander kinders wat verjaar
Enige ander groot uitgawes, spesifiseer asseblief