Geurige seekos-paella
2012-10-17 13:49
- Artikelopsies
- Deel
- Kry Rapport op
GENOEG VIR 6 – 8
BEREIDINGSTYD 20 MINUTE
GAARMAAKTYD 40-45 MINUTE
Paella, ’n Spaanse rysgereg, is ’n heerlike kuier-ete. Dis oorspronklik oor ’n vuur gaargemaak en dus ideaal vir ons braaiseisoen. Sit sommer die paella-pan in die middel van die tafel sodat almal hulleself kan help.
SEEKOS-PAELLA
30 ml olyfolie
1 rooi-ui, grofweg gekap
3 knoffelhuisies, fyngekap
1 rooi soetrissie, in repe gesny
2 chorizo-worse, in skywe gesny
500 ml langkorrelrys
500 ml witwyn
1 ml borrie
1 ml paprika
2 lourierblare
1 410 g-blik gekapte tamaties
1,5 liter hoenderaftreksel
400 g steurgarnale
200 g halfskulp-mossels
5 tiemietakkies se afgestroopte blare
sout en varsgemaalde swartpeper
’n hand vol pietersielie, grofweg gekap
1 Verhit die olyfolie in ’n paella-pan en braai die ui, knoffel en soetrissie saam vir so twee minute.
2 Voeg die chorizo by en braai vir so vyf minute, voeg dan die rys by en braai vir nog sowat vyf minute.
3 Gooi die witwyn by en braai totdat die wyn byna weggekook het. Voeg dan die borrie, paprika, lourierblare en
tamaties by.
4 Skep die aftreksel lepel vir lepel met ’n groot soplepel by. Roer af en toe.
5 Voeg die steurgarnale, mossels en tiemie by so 10 minute voor die rys gaar is. Geur met sout en swartpeper.
6 Sodra die steurgarnale pienk is, is hulle gaar. Strooi gekapte pietersielie oor en sit voor.
WENK
De Wet Viljoen, wynmaker by Neethlingshof, bevel hulle Malbec 2011 (R70), effens verkoel, by dié gereg aan. “Die Malbec se rokerige karakter sal uitstekend by die eksotiese geure van die
paella pas,” sê hy.