Gouelokkies en die TT

My vriendin het vir haar ’n TT gekoop. Ja, dis ’n kar, nie ’n bra-size nie. Sy het haar klein blou 2003-Toyota Carollatjie ingeruil vir ’n pikswart uit-die-boks Audi TT.

“Ja, ek weet ek gaan die volgende paar jaar net droë brood eet, maar ek verdien dit.” Hû? Waar is my gee-alles-én-myself-vriendin heen?

“Maar ek het dit klaar uitgefigure.

Ek gaan weer al wat geleentheid is, bywoon.” Ek lig my stomme wenkbroue. 

“Ja, man, as juniorjoernalis, toe ek R2,50 en ’n hot dog verdien het, het ons elke funksie bygewoon vir die gratis drankies en snacks. Deur die jare raak ’n mens dik vir gevulde eiers en selderystokkies en jy probeer jouself wriemel uit sosiale verpligtinge.” Ek knik instemmend.

“Wel, nooi my nou en ek’s daar! En al daardie orige mans wat my wil uitneem? Die antwoord is ja, solank my maag gedine en my kop gewine is, kan hy maar tot vervelens toe babbel oor sy nuwe nr. 7-yster.” Duidelik was sy al op so ’n date.

Nee, moenie my vriendin oordeel nie. Kom ek noem haar Gouelokkies.

Sedert ek haar ontmoet het, het hierdie fee-meisie my verbaas. Afrikaans, oopkop, maar vreeslik naïef, met ’n onwrikbare geloof in die goeie van die mensdom.

So ses maande terug los haar lewensmaat haar – vir SY soulmate. Gouelokkies was hartgebroke. Sy dag dan sy was sy liefdesbeertjie. En toe op ’n dag stap die beer weer by die deur van Gouelokkies se huis in. Platsak en hy wil weet: Wie het my pap geëet? Wie het op my stoel gesit? Wie het in my bed geslaap? Die soulmate sê hy
het die fout van sy lewe gemaak. Ek hou my asem op.

Gouelokkies sê vir die beer: “Move along Pooh.”

Sit voet in die hoek, Gouelokkies. Brand daardie TT skoon!  

Margit Meyer-Rödenbeck is die bekende vermaaklikheidster Dowwe Dolla se alter-ego!