Herman se pavlova-roomys
2012-09-12 14:20
- Artikelopsies
- Deel
- Kry Rapport op
BEDIEN 10
BEREIDINGSTYD 30 minute
GAARMAAKTYD 45 minute
Dis mos deesdae groot mode om jou huis vir een aand te omskep in ’n opskiet-restaurant – die Engelse praat van ’n pop up-restaurant. Alles draai om ’n tema.
Van hoe jou gaste moet aantrek tot die kos wat jy voorsit, en selfs wat die aand se vermaak gaan wees.
Ek gaan dit dié somer vir die eerste keer probeer, met ’n outydse fliek-aand in my tuin. Op die spyskaart is kos wat jy alles sommer so kuier-kuier met die hand kan eet. En nagereg is geen uitsondering nie: pavlova-roomyshorinkies wat elke gas self aanmekaar kan slaan. Sit groot bakke met meringues, roomyshorinkies en roomys op die tafel.
*Koop die Oktober-uitgawe van Sarie vir die res van Herman se spyskaart vir ’n lekker fliek-aand by jou huis. Nog resepte op www.sarie.com.
Pavlova-roomys
4 eierwitte
320 g strooisuiker
20 ml witasyn
15 ml mielieblom
5 ml vanieljegeursel
pienk koskleursel
10 wafel-roomyshorinkies
1 liter roomys van jou keuse
1 Verhit die oond tot 140 oC.
2 Gooi die eierwitte in ’n skoon mengbak en klits op hoë spoed tot sagte punte vorm – so twee tot drie minute. Gooi dan die strooisuiker lepel vir lepel by terwyl die menger loop. Hou aan klits vir nog vyf tot agt minute tot die mengsel blink en styf is.
3 Voeg die asyn, mielieblom, vanieljegeursel en koskleursel by en meng dit deur.
4 Voer ’n bakplaat met bakpapier uit en spuit goed met kleefwerende kossproei. Skep die meringue-mengsel in ’n spuitsak met ’n 1,5 cm-riffelrandtuit. Spuit die helfte van die mengsel in plat sirkels van sowat 2 cm in deursnee en die ander helfte in rosette van 2 cm in deursnee en so 2 cm hoog.
5 Bak vir 30 tot 35 minute tot die buitekant bros is, maar die binnekant nog malvalekker-agtig.
6 Skep ’n bol roomys in elke horinkie, sit ’n plat meringue bo-op, dan nog ’n bol roomys en rond af met ’n meringue-roset. Sit dadelik voor.
Wenk: Jy kan die meringues die dag voor die tyd bak. Bêre dit in ’n lugdigte houer tot jy dit gaan gebruik.
Roomys en wyn?
Blink gedagte! Die wynplaas Clos Malverne buite Stellenbosch bied nou roomys-en-wynproeë. Hoe klink wortelkoekroomys en pinotage, of appelliefie-en-macadamianeutroomys saam met ’n gehoute chardonnay?
www.closmalverne.co.za