JONG TALENT: Jade De Waal
2012-07-24 12:53
- Artikelopsies
- Deel
- Kry Rapport op
Ek’s altyd vuur en vlam,” sê die borrellende Jade de Waal tydens die onderhoud en fotosessie by haar ouerhuis in Tuine, Kaapstad.
Ons het haar leer ken in die werklikheidsreeks vir aspirantsjefs MasterChef South Africa as die posi-tiewe meisie met die unieke uitrustings… en vreemde aksent.
“Ja, ek wonder soms self oor die aksent, maar ek dink dis omdat ek tussen verskillende kulture groot-geword het – van Xhosa tot Mexikaans,” sê die 21-jarige finalejaarstudent skouerophalend.
Jade het die toptien van die realiteitsreeks gehaal.
“MasterChef is een van my beste memories ooit – van die oomblik toe ek die inskrywingsvorm voltooi het tot my grootste flop. Dit sal my energie gee vir die res van my lewe…”
Jade se ander groot liefde is haar saxofoon en om jazz te speel. Sy het op skool begin saxofoon speel en behoort nou aan die musiekgroep The Little Giants. “Dis ’n projek vir jongmense tussen die ouder-dom van 15 en 24 van Langa, Delft, Rondebosch, oraloor en ons speel Suid-Afrikaanse musiek. ’n Hele nuwe wêreld het vir my oopgegaan met dié groep.”
Nadat sy in 2008 aan die Hoërskool Jan van Riebeeck gematrikuleer het, het Jade besluit om ’n alge-mene BA-graad aan die Universiteit Stellenbosch te studeer. “Daar het ek by Darryl Walters, ’n pro-fessor in saxofoon, ekstra lesse geneem.”
Dis toe dat sy besef het sy móét eenvoudig jazz studeer. “Ek was een aand by my ouers en ek het re-gop gesit in die bed en vir hulle gesê: ‘Ek wil regtig graag jazz swot,’ neergeslaan in die bed en ges-laap,” sy demonstreer die “neerslaan” en lag.
“Hulle sal dit nooit vergeet nie.”
Haar familielede is haar steunpilare. “Hulle is awesome. Dis so cool, want ons is almal so verskillend – my ma, Doreen, is ’n eiendomsontwikkelaar, my pa, Meyer, is ’n prokureur, my ouer broer, Uno, is ’n sosialemedia-strateeg en my sussie, Olivia, is op hoërskool. En almal gee vir mekaar spasie om te doen wat hulle wil.”
Jade het in 2010 geskuif na die Universiteit van Kaapstad en haar BA-graad voortgesit met Frans en jazz-studies as hoofvakke.
“Ek het baie gedink oor wat my eintlike groot liefde is – kos of saxofoon – en tydens MasterChef besef as ek nie die een aan die gang hou nie, gaan die ander een dood. En dan verloor ek my vuur.”
Intussen is Jade se Food Jams, waar ’n groep mense by haar ouerhuis bymekaarkom en almal saam kook en eet, steeds aan die gang en sy doen ook kort internetvideo’s vir eenvoudige geregte.
Sy en haar tannie, die kosskrywer Sonia Cabano, se kookboek, Luscious Vegetarian, word einde vanjaar uitgereik. Haar groot droom nou is om saam met Jamie Oliver te werk. “Ek het vir hom ’n brief geskryf met my planne. Ek het natuurlik nog nie van hom gehoor nie. Maar ek wíl by hom leer.”
En soos ons haar leer ken het, begelei sy seker vir Jamie binnekort in die kombuis op haar saxofoon…
Wie’s jou gunsteling-MasterChef-deelnemer?
Ek’s baie lief vir Khaya. Ons het groot vriende geword en al het sy uitgeval, is sy steeds my wenner.
Die finale episode van MasterChef SA word Dinsdagaand om 19:30 op M-Net uitgesaai.