Kantlyn: Die naelstring van Groot Geluk

Dan (70) en Johnny (76) lyk nie juis soos twee ouens met groot geluk aan hulle kant nie. Maar hulle het.

Dan lyk ’n bietjie soos P.W. Botha en die tatoeëermerk op Johnny se arm is só gebleik dat jy jou oë op skrefies moet trek om dit te ontsyfer. Maar, in die geheel beskou, lyk hulle soos ’n mens sou kon verwag van twee kranige gholfspelers wat op Hermanus kom aftree het.

En wie is hierdie joernalis oorkant hulle? Wat hulle uitvra oor hulle “groot geluk¬skoot”? Waar pas hy in? Ook hulle is nie seker nie.

“Hoe het dit gevoel?” vra die joernalis op meer as een geleentheid aan Johnny in ’n onderhoud buite die gholfklubhuis. “Hoe voel dit om elkeen ’n kolhou te behaal – en dit boonop tydens dieselfde toernooi?”

Die joernalis verklaar hy is self geen gholfspeler nie en Dan en Johnny kyk met beleefde verveling na mekaar.

“Gholf is soos geen ander balspel nie,” verklaar Dan uiteindelik. “Die bal is staties. Jy gebruik nie die bal se momentum soos in ander sportsoorte nie.”

Die joernalis sit vir ’n oomblik en wag vir die stelling om te rol en te val soos ’n la-a-a-ng suksesvolle sethou.

“Maar hoe voel dit om kolhoue te behaal tydens dieselfde toernooi – boonop by dieselfde gaatjie?” vra die joernalis weer.

Hy wil weet of hulle dalk ’n onsigbare naelstring van geluk deel en verbeel hom hoe dié Dan en Johhny hulle pensioentrekkerrondes op hierdie sjarmante kusdorp doen met tussen hulle die buigsaam maar onbreekbare naelstring van Groot Geluk.

Die soort naelstring wat maak dat twee ou mans iewers in Januarie odds van 32 000:1 kon klop tydens ’n potjie gholf met vriende.

Die tipe naelstring wat hulle nou onbepaald bind, wat verstrengel sou kon raak om lamppale en selfs fietsryers onthoof as Dan en Johhny nie hulle bewegings voortaan baie mooi beplan nie.

Maar die joernalis vra liefs nie daaroor uit nie.  

Le Roux Schoeman is ’n video-joernalis by Media24.