Kos is op die tafel!
2013-02-23 23:01
- Artikelopsies
- Deel
- Kry Rapport op
GENOEG VIR 6 TOT 8 MENSE
BEREIDINGSTYD 10 MINUTE
GAARMAAKTYD 70 MINUTE
QUICHE met BOKMELKKAAS
SAAMGESTEL DEUR JEANNE CALITZ
WYNWENK
Danie Steytler jr., wynmaker by Kaapzicht, sê die vars vrugtegeure van hulle Chenin Blanc 2012 (R35) sal die romerigheid van die quiche balanseer.
* Vir nog smullekker resepte, besoek die webwerf www.tastemag.co.za.
BESTANDDELE
1 kg botterskorsie-stukke
15 ml olyfolie
500 g blaardeeg
250 ml room
125 ml melk
1 knoffelhuisie, fyngekap
3 eiers
100 g bokmelkkaas
1 brandrissie, ontpit en opgekap
vars roket, om voor te sit
AANWYSINGS
1 Voorverhit die oond tot 200 °C.
2 Drup die olyfolie oor die botterskorsie en meng goed, geur na smaak met sout en peper en versprei op ’n bakplaat. Sit ’n paar klontjies botter by en rooster vir
30 minute tot sag maar nog ferm.
3 Smeer ’n tertbak met botter en voer die bak uit met die deeg. Bak blind* in die oond vir 10 tot 15 minute. Haal uit en hou eenkant.
4 Sit die room, melk en knoffel in ’n pot op die stoof oor ’n lae hitte en verhit tot dit liggies prut. Haal van die plaat af en laat afkoel.
5 Klits die eiers, en klits dit dan by die melkmengsel.
6 Rangskik die gaar botterskorsie in die tertbak, gevolg deur die bokmelkkaas, in skywe gesny, en gooi die melkmengsel bo-oor.
7 Strooi die brandrissie bo-oor, geur na smaak en bak vir 25 minute of tot die mengsel gestol het en goudkleurig is.
8 Strooi roket oor. Sit warm voor.
WENK
Deur die deeg blind te bak, verseker jy die kors is stewig. Voer die tertbak uit met die deeg en prik die deeg ’n paar keer met ’n vurk. Plaas ’n vel bakpapier bo-oor die deeg (die oppervlak moet effens groter wees as die tert) en vul met droë bestanddele soos rys, boontjies, of bakgewiggies voor jy dit in die oond sit. Wanneer die deeg gaar is, haal uit en verwyder die papier en droë bestanddele.