Maklike eiervrug- en-tamatiegebak
2012-10-21 14:52
- Artikelopsies
- Deel
- Kry Rapport op
GENOEG VIR 4
BEREIDINGSTYD 10 minute
GAARMAAKTYD 30 minute
Wie het nou tyd om ure in die kombuis deur te bring? Hannah Lewry het ’n vinnige maaltyd vir vleisvrye-Maandag ontwikkel.
“Dié gebak is heerlik, veral danksy die rokerige geure van die geroosterde eiervrug. Jy kan die tamatiesous in minder as 30 minute maak, maar as jy tyd het, laat dit bietjie langer prut, dit sal die wag werd wees.”
Eiervrug-en-tamatiegebak
1 ui, fyngekap
60 ml (4 e) olyfolie
3 knoffelhuisies, fyngedruk
2 400 g-blikke gekapte tamaties
3 takkies vars origanum
growwesout en varsgemaalde swartpeper
15 ml (1 e) tamatiepasta
10 ml (2 t) suiker
5 ml (1 t) rooiwynasyn
2 groot eiervrugte, in dun skywe gesny
200 g parmesaankaas, gerasper
vars groenslaai en warm brood om voor te sit
1 Verhit die oond tot 200 °C.
2 Vir die tamatiesous, verhit 30 ml (2 e) olyfolie oor ’n lae hitte en braai die ui vir so vyf minute tot sag. Voeg die knoffel vir die laaste minuut by.
3 Voeg die tamaties, twee takkies origanum en sout en peper na smaak by. Laat prut vir 15 minute.
4 Voeg nou die tamatiepasta en suiker by en laat prut vir nog 15 minute. Haal dit dan van die stoof af en roer die asyn by.
5 Terwyl jy die sous maak, verhit die res van die olyfolie en braai die eiervrug oor ’n medium hitte vir so drie minute aan ’n kant tot dit liggies geskroei is. Geur met sout en peper na smaak.
6 Pak die skywe eiervrug op ’n groot oondbestande opdienbord en bedek met lae van die tamatiesous en parmesaan. Hou van die kaas uit en strooi dit saam met die res van die origanum bo-oor.
7 Bak tot die gereg begin borrel en die kaas goudbruin is. Sit warm voor met ’n vars groenslaai en warm brood.