Maklike feeskos
2012-12-16 00:04
- Artikelopsies
- Deel
- Kry Rapport op
SAAMGESTEL DEUR JEANNE CALITZ
In ’n warm land soos Suid-Afrika wil ’n mens nie op Kersdag voor die stoof staan nie. Volg dié twee resepte deur Abigail Donnelly, kosredakteur van Taste, vir ’n moeitevrye maar heerlike feesmaal.
Koop die Desember-uitgawe van Taste vir nog vakansiekos-resepte (R31,95).
Gerookte ham met Oosterse slaai
GENOEG VIR 4
BEREIDINGSTYD 15 MINUTE
Bestanddele
200 g gerookte ham, soos Woolworths se boekenhout- (beech) gerookte ham
Slaai
10 g vars ment
10 g vars basilie
10 g vars koljander
’n halwe komkommer,
in linte gesny
70 g mangetout, geblansjeer
30 g geroosterde kasjoeneute
15 ml olyfolie
Slaaisous
¼ koppie ryswynasyn
¾ koppie soetrissiesous
Aanwysings
1 Meng al die bestanddele vir die slaai in ’n groot mengbak.
2 Rangskik die slaaibestanddele op ’n opdienbord en sit die skywe gerookte ham bo-op. Meng die slaaisous-bestanddele goed en drup oor die slaai.
WYNWENK
Delheim se Shiraz 2009 (R94) met sy sagte bessie- en speserygeure sal goed hierby pas.
Brie-kaas met pruim-en-pienk-peperkorrel-compote
GENOEG VIR 4 - 6
GAARMAAKTYD 30 MINUTE
BEREIDINGSTYD 5 MINUTE
Bestanddele
1 Grande Brie-kaas van Woolworths, of ’n paar gewone brie-kase
Compote
120 g suiker
625 ml water
¼ koppie rooiwynasyn
5 ml pienk peperkorrels
1 steranys
5 ml kardemom
6 pruime, middeldeur gesny
Aanwysings
1 Sit al die compote-bestanddele behalwe die pruime in ’n kastrol. Roer tot die suiker opgelos het en verhit dan die mengsel tot kookpunt. Voeg die helfte van die pruime by en kook vir 15 minute terwyl jy nou en dan roer.
2 Voeg die res van die pruime by en kook vir nog 10 tot 15 minute tot die vloeistof dik en taai raak.
3 Sny die kaas in ’n stervorm en skep die compote bo-oor.
WYNWENK
Die aarbeigeure en droë palet van Bergsig se Shiraz Rosé (R45) is die ideale pasmaat by dié stylvolle nagereg.