Resep: Heleen se groentedis
2012-08-08 15:29
- Artikelopsies
- Deel
- Kry Rapport op
Maklik, eenvoudig en heerlik: Dié resep van kosskrywer Heleen Meyer is die veelsydigheid self.
Die lekkerste kos is dikwels die eenvoudigste kos. Goeie bestanddele en die regte kombinasie van smake bly die beste resep. Ek het vroeg in my koslewe geleer groente hoef nie altyd net as bygereg op tafel te verskyn nie. Soms kan dit die fokus van die ete wees en die vleis dáárby gekies word.
Hierdie bakplaat vol groente is so ’n gereg. Ek maak dit enige tyd van die jaar. Ons eet ook graag vegetaries en dan is dit ideaal om dit as basis van die ete te berei.
Dis ’n maklike en wonderlik geurige bygereg of maaltyd op sy eie. Sit voor met geroosterde vleis of hoender of roer by gaar pasta en sprinkel parmesaan oor.
Uit Onthoukos (Lapa, R195)
Tamaties, sampioene en uie op ’n bakplaat
75-100 g dennepitte of gevlokte amandels
2 uie, in wiggies gesny
500-750 g bruin sampioene, in kwarte gesny
250 g kersietamaties
30-45 ml balsamiese asyn
50 ml olyfolie
30-45 ml sagte bruinsuiker
sout en varsgemaalde swartpeper na smaak
’n hand vol vars basilieblare
1 Verhit die oond tot 200°C. Sit die dennepitte of neute op ’n bakplaatjie en rooster vir 5-8 minute of tot net goudbruin; oppas dat dit nie brand nie. Laat afkoel.
2 Pak die uie en sampioene in ’n enkellaag op ’n groot bakplaat. Gooi die asyn en olie oor, strooi die suiker oor en geur na smaak.
3 Meng liggies deur en rooster vir 15-20 minute of tot die groente net sag en goudbruin is. Voeg die tamaties by en rooster nog 10 minute of tot skilletjies net oopbars en die tamaties deurwarm is.
4 Skep op ’n opdienbord, strooi die pitte of neute oor en garneer met basilieblare. Sit warm of teen kamer-temperatuur voor.
Wyn-idee
Christopher van Dieren, wynmaker van die wynplaas Cloof op Darling, beveel hulle The Dark Side Cabernet Sauvignon/Shiraz 2008 (R45) aan by dié gereg. “Die bessiegeure sal goed werk saam met die gekarameliseerde suiker en uie, en die geroosterde neute sal die spesery-karakter uitlig.”