Skeppende hoof, Mandie van der Merwe
2012-10-17 13:59
- Artikelopsies
- Deel
- Kry Rapport op
Daar’s ’n gesegde dat almal in die reklamebedryf rock stars is. Jy sê egter self jy’s nie cool nie…
Om kreatief te wees, beteken nie jy moet heeltemal way out wees nie. Wees jouself en wees eerlik met die wêreld oor wie jy regtig is. As jy van nature ’n verantwoordelike soort mens is, moet jy die selfvertroue hê om presies dit te wees.
Van waar jou belangstelling in reklame?
Ek was in die Pro Arte-skool in Pretoria, en daar is ons aangemoedig om te waag met nuwe idees. Maar soos enige verantwoordelike Van der Merwe wou ek in ’n beroep wees waar ek as mens kan groei. (My pa het ook gereken dis ’n slim plan as ek iewers kan gaan werk waar ek betaal word om prentjies te teken.)
Waar het jou loopbaan begin?
Ek het by die AAA School of Advertising studeer en my eerste werk was ’n internskap by Bosman & Johnson, nadat ek as student ’n Pendoring-prys gewen het. Vandag werk ek al tien jaar saam met dieselfde kopie-skrywer, Avish Gordhan, ook die man in my lewe.
Nando’s se advertensies geniet byna kultus-status. In die Pendoring-wenner baljaar Robert Mugabe onder andere saam met Muammar Gaddafi in die duine en stoot hy ’n vinger-swaaiende P.W. Botha op ’n swaai. Watter eienskappe moet jy hê om só iets te help skep?
Beslis ’n donker sin vir humor! Jy kan jouself glad nie te ernstig opneem nie. Dis ook belangrik dat jy van mense hou en mense respekteer – selfs dié met wie jy spot. Jy moet ook koerant lees en op die hoogte bly van wat in die harte en op die tonge van Suid-Afrikaners is. Nando’s probeer altyd iets van die heersende tydsgees en sentiment weergee in hulle advertensies. Laastens moet jy bereid wees om baie hard te werk. Juis omdat Nando’s bekend is vir uitstekende reklame is hulle standaarde baie hoog!
Waar kry jy jou idees?
’n Mens se brein is soos ’n spons. Hoe meer jy aan goed blootgestel word, hoe beter. Ek studeer buitemuurs deur Unisa, met vakke soos filosofie, godsdienswetenskappe en sosiologie sodat ek beter kan verstaan hoe mense dink. Baie idees kom ook uit boeke – ek is mal oor lees. Ek glo jy moet jouself oopstel vir nuwe idees – gaan as ’n Van der Merwe na ’n partytjie, of beter, Soweto toe, en kyk die reaksie!
Watter loopbaanraad sal jy aan mense gee?
Gaan leer by dié met ervaring sodat jy uiteindelik ’n portefeulje en netwerk het waarmee jy ’n loopbaanpad kan stap. ’n Mens kan nie ’n prys aan goeie ondervinding koppel nie.
Kyk by www.youtube.com/watch?v=u1EX--vdxh4 na die Nando’s-advertensie.
Wat doen jy as jy nie advertensies uitdink nie?
Ek versamel vetplante! Ek kan myself nie help nie, as ek ’n plantjie sien, moet ek ’n steggie steel. Ek het seker al 150 plante, en ek bly in ’n woonstel… En ek duik graag – ek was vrek bang, maar moes daardie vrees oorwin, en nou is die onderwaterwêreld vir my baie mooi.