Troefkaart: Kaptein Jean
2012-08-23 10:54
- Artikelopsies
- Deel
- Kry Rapport op
Jean de Villiers (31) is die Springbok-kaptein en het reeds in 75 toetse
vir die Bokke gespeel. Robbie Fleck, ’n oud-Springbok-senter en deesdae
die Stormers se agterlyn-afrigter, gesels oor die vaardighede wat Jean
laat uitstaan.
1 Natuurlike buitesenter
Jean is myns insiens beter op buitesenter as binnesenter. Hy is vinnig, groot – 1,90 meter lank en weeg 103 kilogram – en sterk.
Sy verdediging is skerp danksy sy spoed.
Hy kan soos ’n skaduwee aan die aanvaller se binnekant beweeg en hom plattrek deur laag in te beweeg en hom om die bene beet te kry.
Die Stormers se verdedigingsrekord is die beste van al die Super Rugby-franchises. Dis deels te danke aan Jean se organiserings¬vermoë van hulle verdedigingslinie.
Ek dink sy verdediging vanjaar was die beste nog in ’n Stormers-trui.
Die Springbokke speel Saterdag in Mendoza teen Argentinië in die Rugby-kampioen¬skaps¬¬reeks. Australië en Nieu-Seeland is die ander twee deel¬nemers aan dié reeks.
2 Hier kom spoed
Jean is bedrieglik vinnig. Voor die seisoen begin het, het ons al die Stormers se spoed oor 40 meter getoets. Jean was op 31-jarige ouderdom die vinnigste van die hele lot, Gio Aplon ingesluit. (Net Bryan Habana kon nie getoets word nie.)
Jean sal maklik daardie 40 meter in tussen 4,6 en 4,8 sekondes aflê.
Deur sy hele Springbok-loopbaan was hy altyd onder die drie vinnigstes van ’n bepaalde Springbok-groep.
3 Vaardighede
Sy bewustheid van watter hardlooplyne om te gebruik help hom dikwels om deur gapings te kom. Hy het ’n uitstekende buite-breek, wat hom ’n geskikte buitesenter maak.
Hy kan ook natuurlik na buite uitskuif (in Engels noem ons dit “drift”) en dan die lyn reguit maak. Dis een van sy spesiale eienskappe.
4 Daardie drie teen Engeland
Hy het sy spoed en “drift” veral goed gedemonstreer met daardie drie teen Engeland onlangs. Nie baie senters is vinnig en sterk genoeg om daardie drie te kon druk nie.
5 Spesiale leier
Jean is ’n spesiale leier vir die Bokke en die Stormers omdat sy spanmaats en die bestuur hom respekteer. Hy is ’n inspirerende kaptein wat van voor af lei en het baie by die oud-kaptein John Smit geleer.
Jean sal die bestuur aanraai om nie die span oor die kole te haal as hulle moraal laag is nie. Maar hy sal self onder sy spanmaats inklim as hulle drooggemaak het en ’n paar harde woorde verdien.
Sy tydsberekening oor wanneer om iets te sê, is spesiaal.