Barnabas-blog: Die strepie
2012-09-15 14:00
- Artikelopsies
- Deel
- Kry Rapport op
So drie jaar gelede het ek en my vrou ‘n vlug bespreek Port Elizabeth toe om vir familie te gaan kuier. My swaer, wat nog net twee keer in sy lewe gevlieg het, was erg omgekrap. Daar is so baie vliegtuie wat val, dis nie veilig in die lug nie, het hy ons probeer oortuig.
Ek het besluit om nie met hom te argumenteer nie. Vir my is vlieg nog een van die veiligste en vinnigste metodes van vervoer.
Ek het grappenderwys vir hom gesê: “As jou strepie getrek is, is hy getrek.”
My swaer het nie gedink dis snaaks nie.
As iemand gesterf het, het my pa ook die uitdrukking gebruik: “As jou strepie getrek is, is hy getrek.” Dus, as die Here besluit het dat jy op ‘n spesifieke dag moet sterf, dan sal jy sterf. As kind het ek dit nie verstaan nie.
Waar sou die Here die strepie trek? Het Hy ‘n boek met jou naam en al jou besonderhede daarin, en op ‘n sekere dag en datum is daar ‘n streep getrek? Is dit dan die wil van die Here dat jy op daardie dag moet sterf?
‘n Kind word deur ‘n dronk persoon dood gery. Of ‘n skoolmeisie word verkrag en vermoor. ‘n Baba en sy dagmoeder word vermoor. Gaan jy vir die kind, die skoolmeisie of die baba se ouers sê hulle strepie was getrek en dit is die wil van die Here? Ek dink nie so nie. Jy gaan ook nie vir die dagmoeder se familie verduidelik dat die Here besluit het sy moet vermoor word nie.
Baie van die ellende wat ons ervaar is as gevolg van ons eie toedoen. Ons neem byvoorbeeld die verkeerde besluite en dan is die gevolge traumaties. Of ons leef ongesond en dan is ‘n siektetoestand ons voorland. Maar daar is tye wanneer jy nie verantwoordelik is vir jou pyn nie. ‘n Man verlaat sy vrou vir iemand anders en op die manier is hy die oorsaak van die pyn en vernedering van sy vrou. Dan is daar natuurlik nog Satan wat ook lyding veroorsaak. Maar hy kan nie alleen al die skuld kry nie want ons is soms mede-aandadig.
Ek glo nie dat God die outeur van sonde en lyding is nie, maar laat Hy nie soms lyding toe om ons geloof te toets nie? Dink maar aan Job se geval toe die Here toegelaat het dat Satan alles van Job weg neem.
Ek staan nie onverskillig teenoor mense wat lyding ervaar of ervaar het nie. Ons as ‘n gesin kan ons vereenselwig met lyding omdat ons dit al ‘n paar keer beleef het. Of dit nou argaïes klink of nie, ons het ‘n keuse gemaak om in God te glo en Hom te vertrou, want Hy het ons nog altyd deur alles gelei.
Ek glo ook nie dat God iewers ‘n strepie vir elkeen van ons getrek het nie, of dat dit altyd Sy wil is dat ons ly nie. In die toekoms sal baie dinge nog ons pad kruis.
God het ons nie ‘n maklike rit belowe nie, maar wel ‘n veilige landing. Wanneer alles volbring is, sal God dalk ‘n streep trek.
En dit is nie ‘n bangmaak-storie nie!