Die vet weet: Die wipplank-effek

Ek het vanoggend met die verkeerde voet uit die bed opgestaan. Eers is 2 kg van die 3 kg wat ek laas week verloor het, terug op die skaal. En ek het nie gekroek nie. Toe wil my motorhek om die dood nie vanoggend oopgaan nie - die afstandbeheer se liggie is morsdood, maar dis nie die battery nie - en toe is ek natuurlik laat vir werk. En nou is ek sommer gewoon moerig.

Ek moet myself nou uit hierdie negatiewe rat kry; dis sommer nonsens. Dalk moet ek die wipplank-effek toeskryf aan die PMS wat ek laas maand nie gekry het nie. Vertraagde PMS. Vervlakste hormone.

Wat die 2 kg betref: Ek dink ek moet maar êrens geld bymekaarskraap en teruggaan na my dieetkundige toe dat ek net die wetenskaplike feite oor ’n hoë-proteïendieet by haar kan kry. Dalk doen ek dit nie reg nie; daarom dat ek gewig optel. Of dalk is dit maar net die normale skommelinge. Ek sal dit maar dophou.

Gister het ek op aanbeveling van leser Hoffie Hoffmann ná verlede week se blog vir my ’n tweedehandse eksemplaar van dr. Pierre Dukan se The Dukan Diet gaan koop. (Ek wonder of dit dieselfde Hoffie is saam met wie ek in die 90’s by Die Burger gewerk het.) "The French medical solution for permanent weight loss," staan daar op die buiteblad. Lyk my dis soortgelyk aan die Atkins-dieet, as ek so vinnig kyk, maar bygesê, ek het nog nie kans gekry om veel te lees nie. Dukan skryf in die inleidende stuk van die boek oor al die waarhede, soos dat ’n vet individu nie per ongeluk oorgewig is nie, maar dat hul gourmet-aptyt, gulsigheid en skynbare gebrek aan selfbeheersing eintlik ’n masker is wat ’n behoefte wegsteek om troos in kos te vind.

Dukan sê: It soon became obvious to me that you could not make an overweight person lose weight and stay slim simply by giving them sound advice, even if that advice is based on common sense or scientific research, as the person has no other choice but to obey or try to wriggle out of it.

Support is what an overweight person determined to lose weight really wants and what they need from a counsellor or a method; support so that they are not left alone to face the ordeal of dieting which deliberately goes against their own instinct for survival.

Ek wens so die mense wat ons oorgewig ouens so kritiseer, lees dit en verstáán dit. Maar eers weg van die sielkunde en terug na die wetenskap: Die hele ding van ’n hoëproteïendieet is skynbaar om jou liggaam in ’n toestand van ketose te plaas. Dit klink gevaarlik, maar volgens about.com beteken ketose bloot die volgende: … that our bodies are using fat for energy. Ketones (also called ketone bodies) are molecules generated during fat metabolism, whether from the fat in the guacamole you just ate or fat you were carrying around your middle. When our bodies are breaking down fat for energy, most of the it gets converted more or less directly to ATP (adenosine-triphosphate). Ek het net standerd 7-biologie, maar dit klink basies vir my jou metabolisme word só aan die brand geskop.

Volgens about.com gebruik ’n mens se liggaam vet vir energie wanneer jy minder koolhidrate eet. So dit maak sin dat meer ketone gegenereer word. Sommige van die ketone word vir energie gebruik; die hartspiere en niere verkies glo byvoorbeeld ketone bo glukose daarvoor.

Daar is egter ook minstens een newe-effek: Daar is een soort ketone-molekule, asetoon, wat nie gebruik kan word nie en as afval uitgeskei word, meestal in urine en asem - wat soms ’n slegte asem veroorsaak.

Elkgeval, die uiteinde is steeds dat jy nie vir altyd net proteïene kan eet nie. In ’n stadium moet jy weer meer groente begin eet, asook vrugte en goeie koolhidrate. Anders raak jy so moeg soos ek gister was: Teen 15:00 was my energie op.

Oukei, so ek gaan nou vir die volgende week vasbyt en deurdruk en kophou en koershou. Meer water, meer oefening, minder koffie, geen alkohol… Verder lees aan die Dukan-dieet en die Atkins-dieet… My dieetkundige bel…