Fliekvlooi: Shutter Island laat jou sidder
2010-03-18 14:01
- Artikelopsies
- Deel
- Kry Rapport op
Fliekvlooi het vooraf omtrent niks van dié fliek geweet nie, buiten dat dit op 'n eiland afspeel en nié 'n romantiese komedie is nie. Maar toe die ligte verdoof in die leërige teater (dit was op 'n Maandagoggend) en Leonardo DiCaprio staan daar op die ferry in sy 1950-flannels, toe verdwyn die wêreld om my en ek vergeet skoon van Malema, die misdaad, die ekonomie, slaggate en gebrekkige dienslewering...
Martin Scorsese het dit reggekry om 'n rolprent te vervaardig wat ál die pluspunte van 'n outydse riller vertoon, terwyl hy goed gebruik maak van moderne filmtegniek. 'n Ware meester, dié regisseur.
Mense wat nie graag vir hulself dink nie gaan nie van dié fliek hou nie. Niks word hier vir jou met 'n lepel gevoer nie; jy moet sélf besluit wat jy wil glo. Daar bly vraagtekens oor sekere dinge hang, dis effe ongemaklik, maar die voordeel is dat dit jou baie méér intrek by die verhaallyn.
Dis ook glad nie 'n fliek vir sissies nie. Daar is regtig vreesaanjaende oomblikke, maar dan: wat verwag mens van 'n verhaal wat hom op 'n afgeleë eiland tydens 'n woeste storm in 'n gevangenis/inrigting vir krimineel kranksinniges afspeel?
DiCaprio en sy kollega -- knap vertolk deur Mark Ruffalo -- is op die sombere eiland om die verdwyning van een van die gevangenes/pasiënte te ondersoek. Maar onder draai die duiwel rond... niks is soos dit lyk nie. Of is dit?
DiCaprio se karakter is 'n man met bagasie. Hy was deel van die Amerikaanse troepe wat die oorlewendes in die Nazi-helkampe bevry het. En sy vrou is later onder vreemde omstandighede dood. Mens kry hom eintlik jammer, want dit lyk of trauma sy lewe oorheers het.
Maar alles rondom hom is vreemd en donker. Wie is hy regtig? En waarheen het die pasiënt verdwyn? In haar sel is daar geen aanduidings wat kan verduidelik nie. Buiten vir 'n papiertjie met 'n kriptiese boodskap wat hulle versteek vind.
O, en dan is daar Max von Sydow. Met 'n Duitse aksent. 'n Geheimsinnige dokter op die eiland. Wat doen hy daar? Selfs Ben Kingsley, oënskynlik die simpatieke psigiater in beheer, laat mens vinnig-vinnig onseker voel.
Dis 'n lang fliek en van die kritiek daarop was dat dit met ten minste 'n halfuur gesny moes gewees het. Dis ook emosioneel ietwat veeleisend, met beelde van gemarteldes en vermoordes wat mens bybly ná die tyd. En tog het ek dit boeiend gevind tot aan die einde. En ek hou daarvan dat mens jou brein bietjie moet inspan om te probeer uitwerk hoe pas al die stukke van die legkaart inmekaar.
Gaan kyk en lewer kommentaar oor wat julle van Shutter Island dink. Dis beslis 'n fliek waaroor mens lekker sal kan gesels.
As jou senuwees dit toelaat...