Fliekvlooi: Vir alle De Niro-aanhangers: gaan kyk!
2012-07-13 12:00
- Artikelopsies
- Deel
- Kry Rapport op
Partykeer glo mens rolprentresensente tot jou eie nadeel en verlies. Ek het die resensies oor Being Flynn gelees en, ten spyte daarvan dat ek 'n sterk aanhanger van Robert de Niro is, onmiddellik besluit: dié fliek gaan ek vermy. En tog het iets my uiteindelik aangespoor om te gaan kyk -- dalk die herinneringe van sy klassieke werk in prente soos Taxi Driver en Raging Bull.
En watter wonderlik fliekervaring was dit nie! Toegegee, dis nie Polyanna nie. Dit handel oor die deel van die mensdom wat gewone middelklasmense nie te veel by wil vertoef nie. Buiten dalk om van tyd tot tyd 'n stuiwertjie in 'n bedelaar se hand te stop om hul "goeie burger"-gewete te paai.
Dis gebaseer op 'n ware verhaal en die jonger Flynn, nommerpas vertolk deur Paul Dano, vertel hoe hy vir die grootste deel van die kinderlewe sonder 'n pa moes grootword. Sy ma, gespeel deur die mooie Julianne Moore, het haar uiterste bes gedoen vir hom, maar hy het altyd die leemte aan sy pa gevoel.
En dan kruis pa en seun se paaie weer. En dis alles behalwe goed, mooi of lekker. Pa Jonathan beskou homself as een van die "drie grootste skrywers wat die VSA opgelewer het". (Die ander twee wat hulle -- volgens hom -- in sy uitgelese geselskap bevind is Mark Twain en JD Salinger.) Hy werk aan sy Nobelpryswenner-boek, vertel hy. Net jammer die boek kom nooit klaar nie. Intussen bestuur hy 'n taxi, skel op gays, swartes en Jode, vereensaam al hoe meer, drink onophoudelik -- nie noodwendig in dié volgorde nie. Kort voor lank "verloor" hy sy taxi en sy inkomste, maar die egoïsme bly.
Die fliek is donker en die onderwerp swaar. Maar dís juis waar Robert de Niro se onmiskenbare talent uitblink. Hoe sleg die situasie ookal vir die ouer Flynn raak, Robert de Niro behou daardie beroemde vonkel in sy oog. En hy verstaan kennelik die aanstootlike karakter wat hy uitbeeld, want sy vertolking is eenvoudig meesterlik.
Paul Dano is een van daardie fassinerende akteurs wat 'n tydjie neem om aan gewoond te raak. Hy word veral onthou vir sy vorige rolle as die dikmond tiener in Little Miss Sunshine en die mallerige jong prediker There Will Be Blood. As Nick Flynn hou hy die kyker se aandag met sy interessante vertolking. Hy is die tipe akteur wat nie op 'n pretty boy-voorkoms kan staatmaak nie en miskien juis daarom klim hy heeltemal in Nick se vel in en lewer 'n besonder oortuigende vertolking.
'n Voorsmakie: