Knieknik: Die naakte waarheid

Dit is die koninklike storie van die jaar.

Dit is nou prins Harry wat kaalbas in sy hotelkamer in Las Vegas op film vasgelê is.

Hoewel sommige waarnemers meen dit kan moontlik iemand wees wat baie na die prins lyk, en ander weer meen dit kan dalk CCTV-materiaal wees (wat onwettig is), is die slotsom op die sosiale netwerke tot dusver: dom skuif Harry, dom, dom skuif.

Of Harry se manewales die glans en glorie van die koningin se Diamant-Jubileumjaar gaan verdof, is twyfelagtig.

Harry was nog altyd die "stout seun" in die famile, maar in vele gevalle was prins William ook by hoewel sy teenwoordigheid verdoesel is en Harry telkens die voorbladnuus geword het.

Harry het die afgelope paar jaar hard gewerk aan sy openbare beeld, of altans, sy spindokters het! Met die afsluiting van die Olimpiese Spele was dit prins Henry Wallis (dit is sy doopnaam) wat die koningin daar verteenwoordig het. En dié besluit sou nie ligtelik geneem word nie, dit sou geen moeite gewees het om prins William se vlugrooster op Anglesey te laat verander sodat William die afsluiting kon behartig nie.

Nou het die rooikop-prins gaan vakansie hou in Amerika,en in Vegas (te) lekker partytjie gehou. Hy is in sy swembroek afgeneem met talle mooilyf-bikini-geklede meisies om hom, en het selfs vroegoggend in die swembad gespring (met al sy klere aan) om die Olimpiese swemkampioen Ryan Lochte uit te daag tot n swemresies (Lochte het gewen!)

Harry is op twee foto’s kaalbas op die vermaaklikheidnetwerk TMZ se webwerf. In die een foto hou hy bedeesd sy hande voor sy koninklike juwele, en ‘n naakte meisie is agter hom sigbaar. Op die ander foto is hy van agter afgeneem, met sy hande spelend om die meisie gevou.

Clarence House (waar Harry, William en Catherine se kantoor is) het vanoggend aan die Daily Mail bevestig dat dit wel Harry op die foto’s is. Die koerant berig voorts dat Harry se veiligheidswagte sê hy is nogal ‘n handvol om te bestuur.

Wat dit dié keer sal verg om Harry se reputasie te rehabiliteer? Dalk ‘n tweede ontplooiing na Afghanistan? Of gaan hy soos Pippa Middleton, Catherine se jonger suster, vir ‘n hele ruk uit die openbare oog verwyder word (ná daardie voorval in Parys met die plastiek-rewolwer...)

Die tyd sal leer, en vir eers dink ek Harry moet maar sy pad vind Balmoral toe...

•    Vir die jongste nuus oor koninklikes wêreldwyd volg Arlene Prinsloo Publiek op Facebook.