Lady Godiva: Hoe hanteer jy jou woede?

Het jy al ooit so kwaad geraak dat jy voel jy wil iemand ‘n snotklap gee? Het jy al gevoel jy wil die persoon voor jou wurg tot sy of haar oë uitpop? Het jy al ooit begin huil van woede? Ek het al . . . “and then some”! Ek was ook al kwaad vir myself en dit is die ergste en mees afbrekende kwaad wat daar is.

Ek wou al my bankbestuurder verwurg, omdat hy ‘n groot fout gemaak het -- en daarop aangedring het dat hy reg was.  Dit het my vele slapelose nagte besorg en hy was my kwaadword  nie werd nie. Uiteindelik na ‘n sterk bewoorde brief aan die besturende direkteur van die bank is hy gevra om te bedank. 

“The pen is mightier than the tongue!”

Ek het al kwaad geword vir die polisie wat geweier het om ‘n doodsertifikaat uit te ryk vir my oorlede man. Volgens hulle was hy nie dood nie, alhoewel ek hom in die staatslykhuis gaan uitken het.  Ek het geweier om die stasie te verlaat vóór ek seker kon wees oor wanneer ek die dokument sou kry. Ek het nie omgegee vir wié (sersant, kaptein, bevelvoerder) ek wát sê nie, en dit is ‘n wonder ek is nie toegesluit nie. Ek was heeltemal bef*&%!  Met rede!

‘n Motorhandelaar het die verskil betaal vir ‘n motor wat ek ingeruil het, my "kleingeld" was nogal ‘n aardige bedrag.  Die tjek word toe in my nooiensvan uitgemaak, vir geen duidelike rede nie. Die regstelling het ‘n hele paar dae geneem en volgens my kon dit gouer en makliker opgelos word.  Ek was siedend! Ek het my selfoon weggehou van my oor, daarna gekyk en geskree soos ‘n viswyf op ‘n hawe! “Wil jy hê ek moet vir jou K*& maak?,” het ek kliphard gevra sodat almal rondom my kon hoor.  

My prokureur het altyd vir my gesê, die oomblik wat jy kwaad word sit jy negatiewe energie in jou lyf. Sy is ‘n baie wyse vrou.  En sy is heeltemal reg.

Ek was liggaamlik- en sielsmoeg as ek kwaad geword het, ek was uitgeput en ek was naar. My pols het vinniger geklop en ek was op die punt om iets onverantwoordeliks te doen!  En vir wat ? Wat het ek bereik? Het ek nou regtig ‘n punt bewys deur ‘n vloermoer te gooi? Was die kwaad word enigsins tot my voordeel? Het dinge vinniger gebeur na my tirade? Hoeveel tyd het ek nie spandeer om te tob oor die probleem nie? Slaap het my ontwyk, met vrae soos, hoe de hel kan iemand so dom wees? En hoekom tree mense só op?  Die meeste vrae het onbeantwoord gebly.

Ek het seker rede gehad om kwaad te word na aanleiding van bogenoemde insidente. Maar nou as ek terugkyk besef ek hoe skadelik dit is  om SO kwaad te word.  Ek het waardevolle energie vermors!  

Dit is normaal om kwaad te word, ons leef in ‘n kwaai wêreld.

Ek word deesdae nie kwaad nie, of laat ek liewer sê ek probeer my bes om nie kwaad te raak nie en ek slaag nogal daarin.  Dit is ‘n kopskuif, ‘n moeilike een, want dit is tog so lekker en so vinnig om op jou hoë perdjie te klim.  Jy wil mos ‘n punt bewys.  

Besluit of jy die geveg wil veg. Is hierdie geveg die moeite werd wat ek nou aanvat?  Is daar nie ‘n beter manier om ‘n probleem op te los nie? Is die persoon wat jou kwaad maak jou emosies werd? Waneer jy toelaat dat ‘n mens jou kwaad maak, laat jy hom of haar toe om oor jou te heers.

Wanneer jy jou geliefdes name toegevoeg het wat hulle seermaak, maak jy jouself méér seer. Woorde kan nie teruggetrek word nie, en is dit nou regtig so ernstig as jou vrou vergeet om jou gunsteling-hemp te stryk ? Is dit nie beter om hom of haar te vertel dat jy seergemaak is en nou kwaad is nie? Liewer praat as eendag met ‘n skuldgevoel loop wanneer daardie mens nie meer daar is nie.

Dit is ‘n bevredigende gevoel  waneer jy jou middelvinger kan gebruik vir die persoon wat voor jou ingery het, of jou lippe vinnig beweeg en jy woorde besig wat net matrose sal gebruik. Maar. . .  hoor die ander persoon jou ? En om vir mekaar middelvingers te wys klink soo barbaars.  Wat help dit ? Jy jaag net jou bloeddruk op. Waneer jy by jou bestemming kom is jy heeltemal oorstuur en dit vir ‘n persoon wat jy nie eens ken nie.   

Word jy kwaad vir die persoon of word jy kwaad vir sy of haar dade ?

Jy raak selfs kwaad vir mense en hulle weet dit nie eens nie, gewoonlik onnodig en omdat jou eie ego'tjie seergemaak is, heelwat kere onbewustelik deur die ander party.

Jy word kwaad vir jouself, hoe kon jy so dom wees om dit en dat te gedoen het.  Dink liewer voor jy iets drasties doen, dink voor jy daardie paar stiletto's koop wat jou ‘n ekstra liddoring in ‘n uur se tyd gee en jou kredietkaart in die rooi vat.  Dink voor jy jou haarkleur verander en vir die nuwe stomp-op-die-kop-haarstyl gaan.

Om kwaad te word vir ‘n bankfout/ SARS-fout/Telkom-fout is ‘n mors van tyd en energie, jy gaan niks bereik behalwe as jy bereid is om jou waardevolle tyd te mors en vele oproepe te maak wat niks vinniger gaan laat gebeur nie.  Hoe méér jy skree en skel, hoe minder sal jy ‘n kans hê dat jou probleem vinniger opgelos gaan word. Skryf ‘n brief, praat met ‘n persoon in ‘n bestuursposisie.  As dit moet gaan na www.hellopeter.com en kla.  

Dit is menslik om kwaad te word, maar wat saak maak is hoe jy jou kwaadword hanteer. Maak jy jouself seerder as die ander party deur jou kwaadword en jou optrede as gevolg daarvan of gebruik jy kwaad word om te leer om volgende keer die situasie beter te hanteer ?

Terwyl ek  skryf kom maak ‘n lastige, lam vlieg homself tuis op my lessenaar. . . ek neem ‘n oproep van ‘n vriend en soos ek praat word ek meer en meer geïriteerd met die vlieg!  Ek gryp ‘n tydskrif en wil hom al swetsend slaan, my vriend se droë kommentaar: “Tanya, jy moet vir jouself een van daardie vlieë-plakke kry . . . een met ‘n draad handvatsel”.

Miskien moet ek dit in my handsak ronddra en myself elke keer klap as ek weer waag om te wil kwaad word! Dit is beter om die vlieë-plak te gebruik as die pepersproei waarmee ek myself al bygekom het!