Noumaartoe: Al die móéts en moenies
2012-09-13 13:56
- Artikelopsies
- Deel
- Kry Rapport op
Jy móét dit en jy móét dat ... Maar móét jy?
Nope, seg ek. Daar is NIKS op die liewe aardetjie wat enigiemand móét nie.
Jy móét niks!
Dié drie woordjies lok dikwels vurige gesprekke, gestry en debatte uit. Sommige raak sommer warm onder die boordjie as hulle gedaag word om een voorbeeld te noem waar enigiemand op dese aarde móét.
“Jy moet belasting betaal.”
“Jy moet eet.”
“Jy moet skool toe.”
“Jy moet werk.”
“Jy moet toilet toe.”
“Jy moet asemhaal ...”
Nee, nie een van bogenoemde, of honderdtal ander móéts, is ’n moet nie.
Jy hoef glad nie belasting te betaal, of te eet, of toilet toe te gaan, of skool te gaan of te werk, of selfs asem te haal nie.
Die saak staan eenvoudig só: Alles waaraan die mens kan dink en waaroor hulle wil stry het ’n “anders ... ”
Anders gaan SARS jou opsluit. Anders gaan jy dood van die honger, anders bly jy dom, anders beland jy op straat, anders ontplof jy van konstipasie, anders, anders, anders.
Alles, maar alles is en bly ’n keuse.
Ek betaal belasting omdat ek kies om nie met die wet te bots nie en nog minder in ’n sel opgesluit te word nie. Eet omdat ek wil bly leef (jammer die aanbod oorskrei egter baie dikwels die aanvraag).
Werk omdat ek ’n creature of comfort is. En bowenal, haal ek asem omdat ek wíl bly leef. Ook interessant om ’n bietjie te besin oor wat as ek sekere dinge nie doen nie.
Soos om nie belasting te betaal nie?
Ja, SARS kan my opskroef. Ek kan opgesluit word. Hierdie keuse bied weer ander opsies. Sou ek in ’n sel opgesluit wil word? Kan ek bly sit, myself bejammer en die wêreld daarbuite haat? Of, ek kan daardie tyd nuttig gebruik – behaal ’n graad op die regering se kostes. Hoor van baie wat dit al gedoen het – absurd, ek weet – maar dit bly altyd ’n keuse. So kan ons aangaan met al die móéts en ook die moenies, vir watter rede ookal.
Die enigste, maar enigste móét in dese lewe – is om dood te gaan ... En hier het niemand, nie die koning, baas of Klaas, ’n keuse nie. En die keuse oor wanneer is ook nie joue nie.
Nou maar toe.