kop-op-'n-blog: Huur 'n hubby!

Lank gelede het ek ‘n advertensie uit die koerant geknip van iemand wie se dienste ek toe nooit gebruik het nie, maar wat ek nou sou aangryp. “Hire a hubby” was die opskrif, en hy het sy dienste as nutsman in en om die huis aangebied. Hy sou klein dingetjies in die huis van enkelvroue regmaak – die elekriese prop vervang, ‘n groot, swaar portret ophang, alles wat met ‘n elektriese boor bewerk moet word en so aan. (Oor ander “hubby”-dienste het die advertensie nie ‘n woord gerep nie!)

Nou het ek nie meer die knipsel nie, net mooi as ek hom sou kon gebruik. Die firma wat ek gebel het om my te help om kleinighede reg te stel, se faktuur het my asem weggeslaan. Dis glo ‘n span nutsmanne, maar na my mening is hulle niksnutse. Hulle sien ‘n gaping: al die enkelvroue wat met die hande in die hare sit oor werkies wat ‘n groot maatskappy nie eers sou oorweeg nie, is maar net te bly om hulle te bel en maar op te dok.

Die huur-“hubby” sou darem seker nie by die R5 000 vra vir knutselwerkies wat ‘n halwe dag of minder in beslag sou neem nie. Ons sou agterna lekker op my stoep kon sit en koffie en beskuit geniet en gesels.

Ek kom gewoonlik reg met ‘n geleende “hubby”. ‘n Vriendin en haar man kom eenmaal ‘n jaar by my kuier, en dan mag ek altyd ‘n lysie van die dinge opstel wat ek graag reggemaak wil hê, en as ek en my vriendin die winkels invaar, maak hy sorgsaam en vrolik alles reg wat op my lysie is. So bly my huis darem min of meer ordentlik.

Maar ongelukkig kom hulle eers weer volgende jaar, en my huisnood is hoog. My gewillige, maar redelik onkundige tuinman en ek sal maar moet plan maak.

Maar ai, so ‘n gehuurde “hubby” sou darem baie gawer wees...