Schabir Shaik ’n toets vir Zuma
2009-12-19 19:10
- Artikelopsies
- Deel
- Kry Rapport op
Die regering se hantering van ons koerant se onthullings vandag oor hoe die bedrieër Schabir Shaik spekvet en gesond in Durban rondhang, is ’n toets of pres. Jacob Zuma die land wil regeer soos ’n regstaat of ’n rampokkerbende.
Dit is uit die gebeure duidelik dat Shaik bepaald nie terminaal siek is nie. Sy gedrag en stellings toon duidelik dat hy nie op sy sterfbed lê nie.
Van die begin van hierdie Shaik-siektesage was dit duidelik dat alles nie wel is nie. ’n Koerant is nie ’n braaivleisvuur nie. As ’n mens D.J. Opperman se gedig “Negester en stedelig” effens vir die koerant kan aanpas: Aan jou woorde (as koerant) grens ’n ewigheid.
Daarom het ons ons woorde getel. Maar sien is glo en enigeen kan vandag op die voorblad sien wat aangaan. Mediese parool is ’n menslikheidsgebaar teenoor sterwendes, bedoel om gevangenes in vrede te laat sterwe, soos met die vrylating van die aktivis Bram Fischer enkele dae voor sy dood toe hy sterwend was aan kanker.
Mediese parool is nie ’n guns om aan ’n misdadige vriend te laat bewys nie, en presidensiële kwytskelding is nie ’n geskenk om aan so ’n misdadige vriend uit te deel nie. Dit is regsprosesse vir uiterse omstandighede. Om dit te misbruik of te minag, ondergrawe die regstaat soos gewaarborg deur die Grondwet wat Zuma in sy ampseed beloof het om te eerbiedig en te verdedig.
Algaande meer denkende mense sal algaande moeiliker glo hier is nié ’n slang in die gras nie.
Martin Luther King het gesê al wat nodig is vir boosheid om te oorwin, is dat goeie mense stilbly. Rapport kan oor hierdie gebeure nie stilbly nie, want wat hier gebeur het, is hoogs verdag.
Die Zuma-regering kan die situasie op een van twee maniere hanteer. Die eerste opsie is om dringend ’n onafhanklike ondersoek te laat doen en Shaik medies te laat toets deur onafhanklike medici van statuur; nie kwakke met politieke lojaliteite nie.
Die tweede opsie is om die hande te was soos Pontius Pilatus en niks te doen nie. ’n Meer siniese daad kan ’n mens jou nouliks voorstel, maar dit sal strook met alte veel besluite wat Zuma reeds oor diegene in sy dampkring geneem het.
Die eerste opsie sou die korrekte wees; die tweede, in hierdie Zuma-era, die waarskynlike. Ons hoop op die eerste, maar wat ’n skandelike jammerte dat die korrekte optrede met hierdie president byna nooit die waarskynlike is nie.
- Rapport