Verwyder lamsakke!
2012-01-14 13:40
- Artikelopsies
- Deel
- Kry Rapport op
Die jongste verslag van die nasionale tesourie oor die stand van die land se 283 munisipaliteite wys opnuut waarom daar plek-plek woede en opstand is oor die gebrekkige dienslewering wat mense van hul munisipaliteit ontvang.
Die verslag, wat Woensdag uitgereik is, dui daarop dat 66 van die munisipaliteite in geldnood is en nog 37 is op die randjie van die geldafgrond.
Dus, byna 40% van die land se munisipaliteite, wat aan die voorpunt van goeie dienslewering behoort te wees, is geldelik ongesond. Politieke inmenging en ’n gebrek aan finansiële bestuursvermoë word as redes daarvoor aangevoer. Wie moet die skuld kry?
Hier is die antwoord: Die verslag lui dat die nuwe burgemeesters ná die plaaslike verkiesing op 18 Mei verlede jaar meer bekommerd was oor die “ampsvoertuie” wat hulle sou bestuur, asook oor hul byvoordele.
Dalk het hulle gesien hoe doen die nasionale leiers dit.
Sommige kabinetsministers was mos op ’n aankoopveldtog van luukse motors reeds kort nadat hulle in 2009 aangestel is!
Die verslag dui ook daarop dat burgemeesters dikwels inmeng in die geldsake van munisipaliteite, asook aanstellings, wat tot hierdie agteruitgang aanleiding gee.
Hierdie “leiers” dien nie die land of hul kiesers nie, maar net hulself. Verwyder die lamsakke!