Wat 'n Lotto-skande!

Met die afskop van die Nasionale Lotery in Maart 2000 is groot gewag gemaak van die enorme bydrae wat dit kan lewer tot algemene opheffingswerk in die land deur maatskaplike welsynsprogramme te finansier.

Die geld in die lotery se verspreidingsfonds sou broodnodige bystand verleen aan talle welsynsorganisasies wat met min hulpbronne die mees behoeftiges moes dien. Helaas.

Die afgelope jare is tientalle kere berig oor hoe baie van dié organisasies in skuld gedompel is – hoe van hulle die handdoek moet ingooi en sommige desperaat dreig om hul deure toe te maak weens die gesloer met die uitbetaling van toelaes.

Vandag berig Rapport opnuut oor ernstige onreëlmatighede in die toekenning van hierdie geld. Daar is sprake van wanadministrasie en korrupsie en dit kom ná talle kommerwekkende gevalle van klaarblyklike wanbesteding van Lottogeld.

So is R15 miljoen geskenk aan ’n stigting van een van die lede van die trustfonds. Die groep Earth, Wind & Fire is met R3,7 miljoen geborg vir ’n optrede in Johannesburg. R1 miljoen is aan Cosatu gegee vir ’n partytjie. Die berugte wêreldjeugfees is met R40 miljoen gefinansier. Die sokkervereniging Safa het byna R30 miljoen ontvang.

Niks hiervan het enigsins iets met armoedeverligting te make nie. Dit is ’n absolute skande.

Nie net is daar reeds agterdog by die publiek oor die manier waarop prystrekkings hanteer word nie; die klaarblyklike onbevoegde amptenare by die lotery hou ook broodnodige hulp weg van die armste Suid-Afrikaners.

Dit is hoog tyd dat die minister van handel en nywerheid die sweep klap. Hoe gouer, hoe beter.