Wie regeer nou eintlik die land?

Dit is bepaald nie vir Rapport lekker om vandag ’n ontstellende hoofberig te moet publiseer oor die regering se nuutste gevaarlike rondvallery oor grondwetlik verskanste eiendomsreg nie.

Net soos die bontpratery oor nasionalisering dui op die vakuum wat daar op beleidsvlak rus in ’n regering waar populisme stelselmatig belangriker word as politieke beginsel.

Vandag se voorbeeld is mnr. Gugile Nkwinti, minister van landelike ontwikkeling en grondhervorming. Sy oggend- en aandpraatjies verskil, en dit gaan hier oor mense se lewensbrood.

Op 2 Maart nog het hy onomwonde gesê die regering beplan slegs om in te gryp in die produktiewe bestuur van grond wat herverdeel word of in kommunale besit is. Nou praat hy sy direkteur-generaal na, en is alle produktiewe landbougrond moontlik in die visier, art. 25 van die Grondwet ten spyt.

Op watter afgesonderde werkwinkel die betrokke amptenary en minister mekaar sit in opstoom het om tot die besluit te kom dat hierdie ’n goeie besluit is, weet nugter. Ervaring wys gelukkig dat baie van hierdie onbekookte idees in die snippermandjie beland wanneer nugter bydraes in ’n wyer debatskring volg.

Wanneer die regering die foute van sy weë besef (en watter genade is dit nie telkemale nie!) word daardie ou holruggeryde verskoning gebruik dat die betrokkenes buite konteks aangehaal is, of dat alarmisties opgetree is.

Dit het Rapport nie gedoen nie. Ons is bewus daarvan dat die moontlike wegneem van eiendomsreg een van die grootste vrese van ons lesers is en dat dit neerkom op ’n verkragting deur die ANC van die onderhandelde skikking wat ons Grondwet ondervang.

Ons berig dus nie ligtelik hieroor nie. Ons het sowel vir Nkwinti as mnr. Thozi Gwanya, direkteurgeneraal van grondsake, in kennis gestel van sowel die inhoud van die berigte as hul waarskynlike uitwerking. Die wyse waarop die twee ooreengekom en verskil het, word in ons berig op bl. 2 vervat. Meer kon ons nie doen om hulle teen die gevolge van hul ondeurdagtheid te waarsku nie.

Pres. Jacob Zuma kuier graag saam met allerlei mense, en hierdie week was dit ’n paar Afrikaners wat sy ampswoning besoek het. Mens wens hy wil hom dit aan die verstand bring dat ’n paar drankies en geselsies oor koeitjies en kalfies nooit kan opweeg teen die vergrype wat die aanslag op eiendomsreg verteenwoordig nie.

Hopelik keur sy kabinet hierdie stommiteit af. En hopelik help ons publikasie daarvan dat sy regering die Grondwet eerbiedig en eiendomsreg waarborg. Dis ons bede.

- Rapport