Die voorspelling van Rapport verlede week oor die bedrieër Schabir Shaik is toe bewaarheid.
Pres. Jacob Zuma het niks gedoen om sy groot vriend Shaik, met wie se gesondheid kennelik min tot niks skort nie, terug te stuur tronk toe nie, waar hy hoort.
Minstens het die speurwerk van ons joernaliste daartoe gelei dat die ou skelm vasgevat word. Wees verseker, ons sal toesien dat dit so bly. Dit moet ons doen, want Zuma en sy dampkring sal nie.
Nee, hy is nie so rasgegrond soos oudpres. Thabo Mbeki nie.
Ja, hy is meer teenwoordig in die land. En ja, sy kabinet is sterker. En ja, die algemene spanningsvlak is laer. Boonop sing hy mooi en hy maak etniese denkers, ook in Afrikaanse geledere, vreeslik opgewonde.
Maar Rapport staan by sy mening: Zuma is nie presidensiële materiaal nie. Wanneer hy die regte, maar moeilike besluit moet neem, kan hy gewoon nie. Hy gebruik ander mense, terwyl hyself voortbeweeg na die volgende sangsessie: politiek as teater.
Magsmisbruik en wegskram van ongewilde besluite deur politici is nouliks nuut en kom wêreldwyd voor. Dit bly vreemd hoe hulle dink niemand kom dit agter nie. Die wiel draai altyd.
Swak regerings is vir Suid-Afrika voorwaar niks nuuts nie. Die land se gewone mense sal Suid-Afrika laat vooruitgaan, soos ons altyd doen. Dis egter ’n jammerte dat dit ten spyte van, eerder as danksy, die staatshoof gebeur.