Zuma se sekslewe ís hier van belang

“Ons verlang leiers wat nie ons koppe sal laat hang nie. Ons soek nie leiers vir wie ons ons koppe in skaamte sal moet wegsteek nie.”  Dié woorde van emeritus aartsbiskop Desmond Tutu na aanleiding van mnr. Jacob Zuma se bontpratery oor landsbeleid voordat hy president geword het, was die afgelope week net so geldig.
Suid-Afrikaners kon eintlik maar weer die koppe laat sak. Dié keer oor pres. Zuma se ongure buite-egtelike manewales wat tot wyd in die buiteland weerklank gevind het.

Terwyl Suid-Afrikaners teen dié tyd al met hul president se poligame lewenswyse begin vrede maak het, was die nuus – op die vooraand van die parlementsopening – dat die president sy 20ste
baba in ’n buite-egtelike verhouding verwek het, skokkend om die minste te sê.

Dit het absoluut niks met sy kultuur te maak nie, maar eerder oor sy vermoë (of gebrek daaraan) om homself te beheer.

In dié week moes die land nuwe visie van die staatshoof verwag. Ons moes oor die uitdagings in die land debatteer, want dié is enorm. Pleks daarvan is die tema van die gesprekke nou die president se private eskapades.

Opnuut was hy (welverdiend) die teiken van gekskeerdery.

Die man wat die hoop en aspirasies van die res van die land se inwoners verteenwoordig, behoort meer verantwoordelik te wees. Hy het opnuut gewys waarom hy nie geskik geag word om Suid-Afrika as staatshoof te lei nie. Veral omdat hy as rolmodel misluk het deur weer onveilige seks te beoefen in ’n land met so ’n hoë vlak van MIV- en vigs-infeksie. En dit ten aansien van die grootskaalse gebrek aan morele lewenswyse waaroor hy al self dikwels sy kommer verwoord het.

Die Sowetan het dit op ’n voorblad met sy “Shame of the nation”-hoofartikel goed opgesom.
Zuma is vanselfsprekend omgekrap oor die feit dat sy verhouding met me. Sonono Khoza en die nuus oor hul baba nou bekend is. Hy beskou dit as ’n private saak. Hoewel die Handves van Menseregte in die Grondwet elke burger die reg op privaatheid waarborg, is dit egter nie so eenvoudig nie.

Zuma beklee die hoogste pos in die land en sy leefwyse sál gedurig onder die vergrootglas kom. Daarvoor sal alle waghonde, die media inkluis, sorg – en dis iets waarmee hy vrede moet maak.

So het oudpres. Bill Clinton destyds byna sy pos verloor toe sy owerspelige verhouding met Monica Lewinsky op die lappe gekom het.

En ’n ware leier behoort van voor te lei.

Om links en regs op die ouderdom van 68 seks te hê sonder om voorsorg te tref en kinders te verwek terwyl jy nie die tyd het om hulle by te staan nie, is eenvoudig onverantwoordelik. Punt.

Die land makeer leiers met integriteit en wat voorbeelde stel. Dit kry ons nie van Zuma nie.