’n Voorspoedige 2012

Sport was vir Suid-Afrika in 2011 ’n groot verloorder. En pynlik so.

Die Proteas het omtrent hierdie tyd verlede jaar iets ysliks aangejaag toe Graeme Smith-hulle skandelik teen Nieu-Seeland in die kwarteindronde van die Wêreldbeker-toernooi verloor het. Dit was ’n nederlaag wat die land oorbluf gelaat het. Boonop het Smith nie saam met die SA span huis toe gekom nie, maar hom die verleentheid van ’n onthutste ontvangs hier gespaar deur stil-stil uit Indië na sy meisie in Ierland te vlieg.

Ná ’n teleurstellende Super15-rugbyreeks met g’n silwerware wat Suid-Afrika se kant toe gekom het nie, het die Springbokke by die Wêreldbeker in Nieu-Seeland gesteier en misluk in hul poging om die eerste span te word wat die Wêreldbeker suksesvol verdedig.

Bafana Bafana is boonop onder ’n yslike wolk van omstredenheid uit die kwalifiserende ronde van die Afrikabeker-reeks vir 2012 geboender.

2011 was inderdaad ’n flop-jaar vir Suid-Afrikaanse sport.

Nou het 2012 op ’n blink gepoetste noot begin met die Proteas se eerste reeks-sege tuis sedert 2008, Jacques Kallis se fenomenale 229 lopies en ’n beurt-sege oor Sri Lanka op Nuweland in die beslissende derde toets.

Mag dit die begin van groot sportfeestelikheid vir die land vanjaar wees.