ANC is bruin mense ’n antwoord skuldig

Verlede Sondag se berigte dat ’n miljoen ekonomies aktiewe bruin werkers in die Wes-Kaap weens wysigings aan die arbeidswet hul werk kan verloor, het baie ANC-lede in die Wes-Kaap waarskynlik siedend, veral partywerwers en diegene wat in munisipale wyke wil staan.

Die onthulling daarvan so kort voor die munisipale verkiesing kan – ongeag die skadebeheer wat nou kan volg – die ANC duur te staan kom in ’n provinsie waar hulle sukkel om vordering te maak.

Van die gematigdes in die ANC sal waarskynlik nou die vinger wys na mnr. Jimmy Manyi, die regering se hoofwoordvoerder. Seker tereg.

Die vermoede is sterk hy en sy meer militante trawante sit agter die gewraakte wetswysigings, want dit is glo opgestel in sy dae as DG van arbeid.

Ek glo Manyi het ’n groot rol hierin gespeel omdat hy dieselfde uitlating oor die demografie twee jaar gelede teenoor my gemaak het op ’n konferensie van die Black Management Forum.

Maar, en dit is vreemd, die konsepwetgewing is só deur die kabinet goedgekeur en word dus met erns bejeën.

Manyi se vroeëre uitlatings dat bruin mense hul heil buite die Wes-Kaap moet gaan soek, laat ’n mens oor hom wonder.

In ’n onderhoud in Maart 2010 op Robinson regstreeks op kykNET het hy gesê hy meen dit is belangrik vir bruin mense om te verstaan dat Suid-Afrika in die geheel aan hulle behoort, nie net die Wes-Kaap nie.

“Die oorkonsentrasie van bruin mense in die Wes-Kaap werk nie vir hulle nie. Hulle sal in die res van die land moet versprei. Hulle moet die oorkonsentrasie stop en kyk waar hulle in die vraag kan voorsien…”

Aan Manyi kan ’n mens net sê: Get real! Wil julle opnuut met gedwonge verskuiwings begin?

En hoe wyd is dié siening in die ANC? En wie’s volgende, KwaZulu-Natal se Zoeloes?

Gelukkig het prof. Pierre de Vos, Grondwet-ghoeroe, darem intussen ’n bietjie nugterheid gebring nadat Solidariteit en Cosatu in die Wes-Kaap se syfers van een miljoen werkloses soveel opslae gemaak het.

Hy wys daarop dat die Wet op Gelyke Indiensneming nie van werkgewers vereis om werknemers af te dank om ander aan te stel nie.

Werkgewers moet, benewens die demografie, ook die beskikbaarheid van gekwalifiseerdes uit aangewese groepe in ag neem.

Boonop is daar 54% bruines in die Wes-Kaap, van wie die meeste Afrikaans is, en sowat 25% is swart inwoners.

As bruines moet padgee, is die veronderstelling seker, volgens Manyi, dat derduisende swart mense na die provinsie ontplooi word. En waarheen moet die bruines gaan?

Dit is mos om rassespanning te verhoog en net nog ’n onnodige struikelblok vir die land. Nee wat, dis ’n doodgebore idee.

Maar wanneer ’n mens sulke voorstelle hoor, wonder jy of ons regerende party die plot verloor het.

Jy wonder oor die beloftes van ’n verenigde, demokratiese Suid-Afrika, een waarin alle nasionale groepe gelyke regte sal hê – volgens die Vryheidsmanifes.

Al vergader bruin leiers soos verneem word Dinsdag met die Wes-Kaapse ANC oor dié omstrede kwessie, het die ANC intussen seker nog ’n hele paar volgelinge verloor.