DA is politieke party van die jaar

As mens joernaliste/skrywers vra watter politieke party die afgelope jaar sy staal gewys het, die kieser en belastingbetaler eerste gestel het en groter steun by die stembus verdien, behoort die meeste van hulle ’n redelik eerlike eenstemmige antwoord te bied.

Die artikel op die blad hiernaas gee dalk ’n aanduiding van watter party dit kan wees.

Dit wil voorkom of die kleiner partye soos die UDM en die ACDP steeds min hond haaraf maak en feitlik geen invloed vanjaar op landsake en -bestuur uitgeoefen het nie.

Die VF+ maak hier en daar sy stem dik en sy optrede is daarop gemik om sy kern-kiesers tevrede te hou. Dit doen hulle redelik goed, veral die kommunikasie met die media is van die beste en die party is dikwels die eerste wat op die jongste nuus reageer.

Oor Cope, die sogenaamde Dawid wat namens ons die ANC-Goliat moes pak, wil mens liewer swyg. Gewis die skande van die jaar – en nog ’n bewys hoe faksietwiste dikwels groter doelwitte kelder.

Mens raak ook moeg vir die ANC met sy voortdurende alliansietwiste en binnegevegte, wat kort voor verkiesings gaan lê en eers ná die tel van die stemme weer kop uitsteek.

Dié party herinner mens aan die bruidegom met volop mooi praatjies en leë beloftes voor die kansel en later die ontroue eggenoot wat sukkel om sy troubeloftes na te kom – en sy kinders in toom te hou.

Die één maand waarin die wêreld se oë pal op ons land gerig was, was die beste maand van die jaar. Dit het opnuut beklemtoon watter nasiebouer sport kan wees.

Toe die sokkertoernooi eindig, verdwyn welwillendheid soos mis voor die son. Te blameer was die ANC met sy drakoniese mediamuilband-planne.

Pres. Jacob Zuma het hier en daar – veral toe hy die wilde mnr. Julius Malema by die ANC se beraad in Durban vasgevat het, die gevoel gelaat ons leier kom in beheer. Sedertdien het baie hom as ’n afwesige president ervaar.

Die party van die jaar?

Die feite spreek vanself.

 “Munisipale dienste beste in Wes-Kaap” is die opskrif van ’n onlangse berig in Die Burger. Dit is die wêreld waar die DA regeer.

Mnr. Zwele Mkhize, premier van KwaZulu-Natal, sê onlangs dat baie van die werk wat die DA doen, eintlik deur die ANC-manifes voorgeskryf word. Kort voor dié eerlike uitlating het mnr. Richard Baloyi, minister van die staatsdiens en administrasie, die DA se goeie bestuur en “politieke wil” geloof. Dit was oor die nakoming van tenderprosedures, korrekte kontrakte en geldbesteding.

Wat ’n getuigskrif aan ’n opposisieparty!

Voorts kon me. Helen Zille, DA-leier, Malema al dikwels oor lasterlike uitlatings gedagvaar het, maar sy het nie. Dit teenoor die ANC-leier wat pal in die hof is om die media te vervolg.

En met die samesmelting van die OD met die DA, het laasgenoemde vanjaar groter groei getoon. Die DA het ook in talle tussenverkiesings sy steun uitgebrei en Zille slaag goed daarin om dissipline in haar party te behou.

Die DA kon met die toilet-sage in Khayelitsha waarskynlik ’n meer konstruktiewe benadering gevolg het, want die afbreek van die toilette het op TV nie goed oorgekom nie.

Desondanks is die Demokratiese Alliansie myns insiens dié party van 2010.