Menseregtedag moet beter benut word

Daar is reeds geskryf oor pres. Jacob Zuma se gebrek aan optrede toe me. Patricia de Lille Maandag by die Menseregtedagvieringe in Athlone uitgejou is.

Van die kommentaar was dat die ANC toelaat dat ’n kultuur van onverdraagsaamheid in die land gedy.

Ander meen dit was ’n ideale kans vir Zuma as staatshoof om sy stempel af te druk, maar hy het verkies om soos ’n ANC-leier op te tree by ’n regeringsgeleentheid waarvoor die belastingbetalers betaal.

Hy is “diep teleurgesteld”, sê ’n Kaapse vriend en voormalige politikus. Hy meen die president moes self agter die mikrofoon ingeklim het, die belhamels voor stok gekry en die sekuriteitsmense opdrag gegee het om hulle te verwyder, sou hulle nie gehoor gee nie.

Wel, dit het nie gebeur nie en mense wonder toenemend oor ons president.

Dit was immers ’n dag met die fokus op die regte van mense, ook De Lille s’n, en iets waarvoor talle in die bevrydingsbeweging gesterf het.

Barney Mthombothi, redakteur van Financial Mail, noem dat Zuma nie eens in sy toespraak na die gebrek aan dissipline verwys het nie, dat onverdraagsaamheid nou maar eenmaal deel is van die ANC se DNS. Dit is reeds so sedert die dae van ballingskap toe die beweging homself gesien het as die enigste verteenwoordiger van die verdruktes.

Maandag se gebeure eers daar gelaat. Wat beteken Menseregtedag nou eintlik? ’n Jaarlikse terugblik by ’n ANC-saamtrek oor die foute by Sharpeville?

Ek is nie onsensitief teenoor die tragedie van 21 Maart 1960 nie, maar ons moet vorentoe kyk. Veral omdat soveel mense daagliks in die nuwe Suid-Afrika hul lewens verloor, hoofsaaklik weens geweldmisdaad en die beskikbaarheid van vuurwapens.

Dié dag behoort beter benut te word. Tans is dit net nog ’n vakansiedag.

Dalk is dit ’n geleentheid waar gewone burgers die kans moet kry om vrae te vra, soos hoekom daar geen rekenskap gegee kan word nie van meer as 26 000 vuurwapens wat in polisiebesit was nie?

Daagliks lees ek in koerante oor mense se grudood weens die beskikbaarheid van onwettige wapens…en jy kan net die kop skud.

Dalk moet ons op dié dag praat oor die korrupsie wat ons land so vernietig.

Of dalk kan ons eerder op Menseregtedag dít vier wat ons as ménse in Suid-Afrika saambind en ook leer hoe om mekaar as medemens te respekteer.

Ons het darem al ’n ver ent gevorder. Neem byvoorbeeld die menseverhoudings tussen groepe wat onder gematigdes met rasse skrede verbeter. By die gimnasium sien jy dit. In die kerk, in die winkelsentrums, op die sportveld, in bioskope, oral. Nie danksy die ANC nie, maar ondanks.

Al hierdie onverdraagsame heethoofde met die skril stemme, ook dié wat De Lille probeer doodskree het, is die nuwe agtergeblewenes. Hulle sit vas in groewe waaruit ander lankal losgekom het en behoort gedissiplineer te word.

Die ANC moet sy rol begin speel dat ons kan vorder in die erkenning van mense se regte. Dié party, en sy leier, behoort hul sokkies op te trek.