Sê dit maar: pres. Julius Sello Malema

Daar weet ons nou hoekom Julius Malema so behep is met doodmaak. Eers sou hy moor ter wille van pres. Jacob Zuma en nou kan hy nie ophou “kill the Boer” sing nie.

Dis omdat hy, volgens sy eie getuienis in die hof, al vanaf 11-jarige ouderdom blootgestel is aan vuurwapens. Hy was op 13-jarige ouderdom op wyle Chris Hani se begrafnis oorgehaal om dood te maak!

Dis te betwyfel of Malema en die swart seuns van die destydse townships ooit berading ontvang het om al hul traumas te verwerk.

Is dit, in die afwesigheid hiervan, wel moontlik om in ’n gebalanseerde volwassene te ontwikkel? Is dit nie dalk ’n rede waarom ons samelewing so gewelddadig is nie?

Maar dis ’n onderwerp vir ’n ander dag.

Wat my pla van die saak waarin AfriForum Malema van haatspraak aankla, is dat die ANC as leidende party nie al vroeër iets hieromtrent gedoen het nie.

Dít terwyl soveel brandende kwessies in die land wag en in die lig van ’n dure verpligting om nie-rassigheid en nasiebou te bevorder.

Buitendien het ons ’n reputasie as die land wat op 27 April 1994 die wêreld verstom het met die vreedsaamste politieke oorgang nóg op die vasteland!

Dié vryheid, wat ons eerskomende Woensdag vier, het nie gekom ná grootskaalse bloedvloeiing in oorlog nie, maar deur dialoog tussen wit en swart, deur te luister en voorstelle uit te ruil.

Dit lyk of ons die suksesresep verloor het. Het veral die ANC te arrogant geraak?

Daar gaan geen wenners wees in dié saak nie, net groter polarisasie. Die regter sal ’n Salomo-uitspraak moet voorberei.

Hopelik hou dit rekening met navorsing wat toon dat driekwart van die land se mense meen die frase “skiet die Boer” is wel haatspraak.

Ek hoop AfriForum, Malema en die ANC kan nog ’n kompromie bereik. Dalk een wat lui dat die ANC onderneem om die lied net by private geleenthede te sing. Dit ís immers deel van hul erfenis.

Nes ons ander liedere by gepaste geleenthede sing: Stille Nag oor Kersfees of Shosholoza by rugbywedstryde.

Die meerderheid sal in elk geval nooit ’n lied kan sing wat moord en doodslag bevorder nie, want dit pas net nie in ons waardestelsel nie.

Dit neem beslis ook nie ons land vorentoe nie.

Dié hofsaak is blykbaar vir Malema en die ANC waardevol. Malema kon nie vir beter propaganda gevra het vir sy pogings om in Junie weer jeugligaleier te word nie. Dit het ook die politieke skade van die dood van mnr. Andries Tatane voor die verkiesing op 18 Mei beperk.

Met dié saak het AfriForum ook dalk net Malema se langtermynloopbaan verbeter: In 2007 is daar voor die stemmery by Polokwane gefluister dat mnr. Kgalema Motlanthe baie “presidensieel” voorkom, dat hy pres. Thabo Mbeki sou kon vervang.

Die afgelope week was dit Malema in die hof. Dié Jacob Zuma-gesalfde was so presidensieel soos kan kom.

Laat ons dus maar solank oefen: president…Julius...Sello...Malema. En begin sidder.

- Rapport