15 Mei is D-dag vir SA atletiek
2010-03-06 19:56
- Artikelopsies
- Deel
- Kry Rapport op
johan.vanwyk@sport24.co.za
Saterdag 15 Mei is D-dag vir Suid-Afrikaanse atletiek, wanneer die Leonard Chuene-regime amptelik begrawe word en ’n nuwe president en bestuur van Atletiek Suid-Afrika (ASA) verkies word.
En die eerste skote in dié verkiesingstryd het reeds geklap in twee van die land se sterkste provinsies, Sentraal-Gauteng en Gauteng-Noord.
In albei bonde is “hervormers” tot nuwe presidente verkies:
* In Sentraal-Gauteng is James Moloi “met groot akklamasie” verkies, nadat hy die SA rekordhouer in die 400 meter, Arnaud Malherbe, in ’n tweestryd verslaan het.
Dié verkiesing het ’n interessante (sommige sê verrassende) wending geneem, toe die SA marathon-breker Hendrick Ramaala moes handdoek ingooi omdat hy nie deur ’n klub genomineer is nie.
Dít kom nadat Ramaala in veral sekere atlete-kringe tot onlangs as ’n sterk aanspraakmaker op die ASA-presidentskap beskou is.
Moloi was agter die skerms die sterkman wat ’n groot rol in Chuene se val in sy eie provinsie gespeel het.
Toe Chuene sy oë uitvee, het sy eie klub, Meadowlands, hom geskors.
By dié Sentraal-Gautengse verkiesing het die koppe ook gerol van drie provinsiale bestuurslede wat sitting in die nou-vergange vorige ASA-raad gehad het.
* In Gauteng-Noord is ’n ou bekende en jarelange strydros, James Makoka, eenparig sonder slag of stoot verkies.
Daan du Toit, wat tussentydse president was nadat Chris Britz vanweë “noue bande met die Chuene-regime” (hy was op ’n kol “ASA-woordvoerder”) uitgeskop is, het hom vóór die verkiesing as presidentskandidaat onttrek.
Sy onttrekking word as ’n “skikkingsgebaar” gesien.
* In verskeie van die ander 15 provinsies word agter geslote deure gekoukus voordat ook hulle nuwe besems kies en na die Mei-vergadering stuur.
In die Suide (WP en Boland) staan die Bolandse president, dr. Harold Adams, “baie, baie sterk” – veral ná sy laeprofiel-hantering van die Caster Semenya-sage.
Hy bly ’n sterk kandidaat vir die ASA-presidentskap, ook vanweë sy hoë aansien in internasionale kringe.
Die WP-president, James Evans, “behoort êrens in die nuwe ASA-bestuur geakkommodeer te word”, nadat hy ’n sleutelrol in die tussentydse ASA-bestuur gespeel het.
In KwaZulu-Natal, gemeet aan getalle die land se grootste provinsie, staan Alex Skosana glo “onaantasbaar sterk”. Hy vertolk ook ’n sleutelrol in die tussentydse ASA-bestuur.
- Rapport