Branden reik na Europese deurbraak
2012-01-14 23:42
- Artikelopsies
- Deel
- Kry Rapport op
Op die jeugdige ouderdom van 23 spog Branden Grace al met ’n lys prestasies wat menige ander gholfspelers in die skadu stel.
Hy het onder meer die Suid-Afrikaanse Amateurkampioenskap in 2006 gewen; was ’n paar maande later die beste amateur in die Suid-Afrikaanse Ope; het voor sy 21ste verjaarsdag ’n Europese spelerskaart verseker – en hy het met sy swaai, lengte van die bof af en houding tot gholf al lof van spelers soos Gary Player en die Spanjaard Sergio Garcia ontlok.
Die afgelope week is dié Suid-Kapenaar by die Sonskynreeks se jaarlikse toekenningsaand met die Gary Player-trofee beloon vir die laagste ronde-gemiddeld van 2011 (69.41) – ’n aanduiding van sy bestendigheid in dié reeks, wat ook onderstreep word deur die feit dat hy in byna die helfte van sy 41 toernooie in Suid-Afrika in die top-10 geëindig het.
Daar is duidelik ’n klómp redes waarom Grace in Suid-Afrika reeds sedert sy amateur-dae as ’n toekomstige superster beskou word, en waarom die Golf Channel ’n paar weke gelede voorspel het dat hy voor die einde van vanjaar ’n Europese titel kan wen. Dié jong man het ernstige talent.
En aan die vooraand van wat hy hoop ’n waterskeidingsjaar buite sy geboorteland sal wees, het hy ook ’n oormaat selfvertroue.
Grace het die Europese kaart wat hy aan die einde van 2009 verloor het die afgelope Desember by die toerskool herwin, en sê hy sal dié tweede kans veel beter hanteer as die verspeelde een van drie jaar gelede.
“Die eerste keer het alles baie vinnig gebeur. Sielkundig en gholf-gewys was ek nie gereed nie,” het Grace die afgelope week by die Royal Johannesburg & Kensington-gholfklub gesê. “Nou is my gholf beslis beter as ’n paar jaar gelede. Ek het gegroei as ’n speler – en daar gebeur steeds baie dinge met my waaruit ek leer.
“Daar is ’n klomp goed wat ek dié keer anders sal doen – harder konsentreer en harder oefen – en ek gaan my status in die Europese reeks nie as ’n gegewe beskou nie.”
Ondanks sy bestendigheid, het Grace steeds net een professionele sege agter sy naam: die Coca-Cola-titel wat hy in 2010 gewen het. Hy sê dit is soms frustrerend, maar dat hy nog nie perspektief daaroor verloor het nie.
“Dit is frustrerend, maar dis lekker om te weet die bestendigheid is daar,” het hy gesê. “As jy kyk na iemand soos (die wêreld se voorste speler) Luke Donald het hy nie baie gewen voor verlede jaar (toe hy vier titels opgeraap het) nie, maar sy uitslae is sy hele loopbaan lank baie bestendig.
“Een of ander tyd gaan dit ook vir my vrugte afwerp. In dié stadium voel ek naby aan ’n oorwinning. Ek is regtig tevrede met my gholf.
“In die verlede het my setwerk en my kortspel my teruggehou, maar nou is dit veel beter. Ek maak langer sethoue en ek gee myself meer kanse om op naweke in die prentjie te wees.”