George, Branden veg om geldglorie
2012-12-02 00:30
- Artikelopsies
- Deel
- Kry Rapport op
Die heel eerste Nelson Mandela-kampioenskap sal Donderdag op die Royal Durban-gholfklub sonder ’n enkele van Suid-Afrika se major-kampioene begin – maar dit laat die deur oop vir die twee toekomstige supersterre wat sake oor die volgende twee weke om Sonskynreeks-geldglorie sal uitspook.
Branden Grace, wat vanjaar reeds vyf keer gewen het, en George Coetzee (die naaswenner in die Suid-Afrikaanse Ope) is die voorlopers op die Sonskynreeks se geldlys en hoewel heelwat ander spelers die kroon onder hul neuse kan wegsteel, laat die duo se huidige spelpeil dit baie onwaarskynlik lyk.
Grace gee die pas aan met verdienste van R2,45 miljoen in ses toernooie vanjaar.
R2,14 miljoen daarvan ná sy Joburg-Ope-sege in Januarie. Louis Oosthuizen beklee die tweede plek met die R1,66 miljoen wat hy in die Afrika-Ope gewen het, maar hy sal nie die nodige getal toernooie speel om in aanmerking te kom nie.
Dit plaas Coetzee – wat R1,56 miljoen in vier toernooie verdien het tweede op die lys met sowat R900 000 minder as Grace.
Met die Nelson Mandela-toernooi in Durban en aanstaande week se Alfred Dunhill-kampioenskap buite Malelane, wat miljoene beloop, kan Coetzee sy Suid-Kaapse vriend dalk inhaal.
Ander spelers wat nog ’n kans staan om bo-aan die lys te eindig sluit in Trevor Fisher jr., Jaco van Zyl, Thomas Aiken en Darren Fichardt.
Die meeste spelers in die Mandela-toernooi is van Suid-Afrika, maar ook met ’n sterk Engelse verteenwoordiging.
Die land se major-kampioene sal afwesig wees.
Louis Oosthuizen en Charl Schwartzel is van Donderdag af in aksie in die Thailand-kampioenskap, Retief Goosen herstel van sy skoueroperasie en Ernie Els en Trevor Immelman het die week af.