Gordon: Bafana nog op koers
2012-10-13 22:52
Die Suid-Afrikaanse sokkerspan kan steeds nie met ’n Europese teenstander afreken nie én Gordon Igesund het nou meer wedstryde verloor as wat hy gewen het aan die stuur van Bafana Bafana, maar dié afrigter meen sy span is op koers na ’n stewige vertoning in die Afrikabeker-toernooi.
Die Suid-Afrikaners het eergisteraand in die Kazimierz Gorski–stadion in Warskou met 0-1 vasgeval teen Pole, danksy ’n doel in die 82ste minuut deur die plaasvervanger Marcin Komorowski. Tog kon die skade veel vroeër, véél erger gewees het – was dit nie vir ’n uitmuntende Itumeleng Khune nie.
Dié 25-jarige doelwagter het ’n halfdosyn Poolse doelpogings gefnuik, maar hy moes hulpeloos toekyk hoe Komorowski toeslaan?– toe ’n soveelste Bafana-verdedigingsflater dié Oos-Europeër met ’n onbemande doelhok gelaat het.
Siyabonga Sangweni het kort daarna so byna die gelykmaker behaal, maar die lynregter se onkantvlag het Suid-Afrikaanse harte gebreek.
“Natuurlik is ons teleurgesteld, maar ek het gesien wat ek wou uit die wedstryd,” het Igesund, wat in Junie as Pitso Mosimane se opvolger aangewys is, agterna gesê.
“Ek het ’n paar jong spelers kans gegee in die span en dis alles deel van ons voorbereiding vir die Afrikabeker.
“Ek gee nie om om wedstryde soos dié te verloor nie, mits die spelers leer daaruit. Dit berei jou voor vir die kragmetings wat tel.”