Groot skuiwe kom in SA gholf

Drie van Suid-Afrika se vier groot gholftoernooie kan dalk van aanstaande jaar af eers in Februarie plaasvind, met net die Suid-Afrikaanse Ope wat aan die einde van die kalenderjaar sal bly.

Rapport verneem daar is samesprekings om die Afrika Ope en Joburg Ope – wat tans in onderskeidelik die eerste en tweede weke van Januarie deur die Sonskynreeks, in samewerking met die Europese reeks, aangebied word – van 2013 af ’n maand later te hou.

Dit sal dan plaasvind ná die soegfnaamde “woestynfase” van die Europese reeks, wat toernooie in Katar, Abu Dhabi en Dubai insluit.

Die grootkoppe van die Europese en Sonskynreekse hoop volgens inligting ook om die Alfred Dunhill-kampioenskap, wat verlede jaar in November plaasgevind het, óók na Februarie te skuif.

Daar word glo steeds hieroor onderhandel.

Daar is in dié stadium geen duidelikheid oor die Dunhill-toernooi se onmiddelike toekoms nie.

Dié toernooi verskyn nie op die Europese reeks se skedule vir 2012 nie.

Volgens die skedule wat die reeks ’n paar weke gelede uitgestuur het, sal die Suid-Afrikaanse Ope vanjaar van 15 tot 18 November by die Serengeti-gholfbaan in Ekurhuleni plaasvind, in dieselfde week as die Hongkong Ope.

’n Week later word die seisoen afgesluit met die Dubai-wêreldkampioenskap.

Daar is drie oop weke in die skedule – onderskeidelik in Mei, Augustus en Oktober – maar dis onwaarskynlik dat die Dunhill-toernooi in een van daardie oop gate ingepas sal word.

Die plan is glo nou om dit in die tweede week van Desember aan te bied (soos dit tot in 2010 die geval was) – en dit gevolglik die eerste toernooi van die Europese reeks se 2013-seisoen te maak.

Die Sonskynreeks het aan Rapport gesê daar is nog geen definitiewe planne rondom die volgende datum van die Dunhill-toernooi nie.

Maar dit lyk redelik seker dat dit nie deel van die Europese reeks se 2012-seisoen sal vorm nie.

Wat die Afrika Ope betref, is die organiseerders glo baie gewillig om in ’n Februarie-tydgleuf in te skuif.

Dié toernooi is vanjaar hard getref deur die lengte van die 2011-reeks, wat eers in die tweede week van Desember afgesluit is.

Dít het daartoe gelei het dat talle spelers in die eerste week van Januarie steeds vakansie gehou het.

Die Joburg Ope, wat vandag sal eindig, het dieselfde probleem.