Kampioen van kul

Lance Armstrong se US Postal Service-span (USPS) het hul busbestuurder glo midde-in die Tour de France van 2004 aangesê om te maak of hul spanbus enjinprobleme ervaar – alles sodat Armstrong, Floyd Landis, George Hincapie en tientalle ander jaers ’n halfliter bloed terug in hul are kon pomp.

Dít is maar een van tientalle maniere waarop Armstrong en die USPS-span toetsbeamptes glo ontduik het terwyl hy sy pad na sewe agtereenvolgende Tour de France-titels oopgekul het.

Die Amerikaanse agentskap teen verbode middels (Usada) het die afgelope week ’n verdoemende verslag onthul, waarin Armstrong en die USPS-span by die “mees gesofistikeerde, professionele en suksesvolle opkikkerprogram wat sport tot nog toe gesien het” betrek is.

Meer as twee dosyn mense het getuienis gelewer, waaronder elf van die jaer se voormalige USPS-spanmaats.

Armstrong word onder meer daarvan beskuldig dat hy verbode middels soos Erythropoietine (EPO) – ’n verbode middel wat die produksie van rooibloedselle stimuleer – bloedoortappings, testosteroon en maskeermiddels gebruik het.

Landis, wat hom in 2002 by die USPS-span aangesluit het, sê Armstrong het hom in Junie 2002 vertel hoe hy die jaar vantevore positief getoets het vir die gebruik van EPO.

Armstrong en die destydse spanbestuurder, Johan Bruyneel, het daarna glo omkoopgeld aan die president van fietsry se internasionale beheerliggaam (UCI) betaal om dié uitslag onder die mat te vee.

Jonathan Vaughters getuig weer hoe Armstrong ’n saline-oortapping tydens die Wêreldkampioenskap van 1998 ontvang het. Die soutoplossing is onder die toetsbeampte se neus na Armstrong se hotelkamer gesmokkel – iets waaroor hy later geskerts het.

Hincapie het Armstrong in 2000, tydens ’n ren in Spanje, laat weet toe toetsbeamptes by hul hotel opgedaag het. Armstrong, wat testosteroon in die ren gebruik het, het homself onmiddellik daarvan onttrek.

Usada se verslag van meer as ’n 1 000 bladsye bevat deskundige analises van Armstrong se bloedmonsters, uitgebreide e-posse en bankstate wat staaf dat Armstrong meer as $1 miljoen aan die Italiaanse dokter, Michele Ferrari, betaal het.

Dít in ’n tydperk waarin Armstrong enige verbintenis met Ferrari ontken het.

Armstrong, wat lewenslank uit fietsry geskors is en voorlopig deur Usada van sy sewe Tour-titels gestroop is, het besluit om nie díe beslissing te beveg nie.