Koningin Victoria!
2012-01-28 23:14
Victoria Azarenka van Belo-Rusland is die nuwe Australiese Ope-kampioen nadat sy die Rus Maria Sharapova in gister se eindstryd verneder het.
Die 22-jarige Azarenka het die eerste Grand Slam-titel van haar loopbaan verower deur Sharapova met 6-3, 6-0 te stoomroller. Dié oorwinning maak ook van haar die nuwe nommer een op die wêreldranglys.
Azarenka het albei haar laaste eindstryde teen die meer ervare Rus gewen, maar met Sharapova ’n driemalige Grand Slam-wenner – en sy sonder enige ondervinding van eindstryde op die grootste verhoog – was gister se wedstryd ’n perd van ’n ander kleur.
Azarenka het die eindstryd begin soos iemand wat goed geweet het hoe steil die bult kán wees, en haar heel eerste afslaanpot aan Sharapova afgestaan. Sy het geen ritme op haar afslaan gehad nie, en Sharapova gans te veel ritme gegee.
Dieselfde het gegeld in die eerste twee punte van haar tweede afslaanpot, maar met die telling op 0-2, 0-30 in Sharapova se guns het iets in die Belo-Rus se kop gekliek, en was sy skielik ’n ander speler.
Sy het elf van die volgende twaalf punte gewen, onder meer alles in Sharapova se tweede afslaanpot, om sake gelyk te maak, en vier potte later weer deurgebreek om op die voorvoet te kom.
Sy het die stel net vyf minute later haar eie gemaak.
Daarna het Sharapova kop verloor. Sy het ongedwonge fout op ongedwonge fout gemaak, en haar skouers het baie vinnig begin hang.
Azarenka het nie twee uitnodigings nodig gehad om dit uit te buit nie. In die tweede stel het sy 71% van die punte op haar eie eerste afslaan, en 75% van dié op Sharapova se eerste afslaan gewen, en net 36 minute nodig gehad om die trofee en groot wentjek hare te maak.
Haar reaksie was om op haar knieë neer te sak en met die woorde, “Ek kan dit nie glo nie”, na haar familie op te kyk.
“Wow,” het sy daarna aan die skare gesê, en toe begin giggel. En aan haar span het sy gesê: “Julle het my laat besef ek kan in myself glo en uiteindelik hierdie trofee lig.”
Dis die tweede keer in sewe maande dat Sharapova in ’n Grand Slam-eindstryd verloor, en nou reeds vier jaar sedert sy haar laaste groot titel in die Australiese Ope van 2008 gewen het.