Paralimpiese Spele: Inspirasie vir die nasie
2012-08-25 23:57
Die lem-naelheld, Oscar Pistorius, sal Woensdagaand in Londen met die opening van die Paralimpiese Spele die Suid-Afrikaanse vlag dra, maar die span se hoop sal op dié Spele weer op die breë skouers van die swemmer Natalie du Toit rus.
Die 28-jarige Kapenaar, wat aan haar derde Paralimpiese Spele deelneem, hoop om dié keer sewe medaljes huis toe te bring. Sy tree ná die Spele uit.
Natalie, wat Suid-Afrika ook al op die Olimpiese en Statebondspele verteenwoordig het, spog reeds met tien goue Paralimpiese medaljes.
Met die vorige Paralimpiese Spele – vier jaar gelede in Beijing – het die Suid-Afrikaners altesame 30 medaljes verower.
Hiervan was 21 goud.
Pistorius, wat ook aan die pas afgelope Olimpiese Spele deelgeneem en daar die verbeelding aangegryp het, sal probeer om in die 100, 200 en 400 met die louere weg te stap. Hy het agt jaar gelede in Athene as 17-jarige Pretoriase skoolkind in die Paralimpiese Spele die die wêreld die eerste keer van hom laat kennis neem.
Hoewel hy met die Olimpiese Spele baie aandag getrek het, sal hy waarskynlik met die Paralimpiese Spele nie so baie op die voorgrond wees nie – omdat hy dié keer net een van sowat 4 200 gestremdes uit 166 lande is wat aan 18 sportsoorte deelneem.
’n Rekord 1 513 vroue neem deel.
Die Suid-Afrikaanse span van 62 atlete het vandeesweek reeds sy intrek in die Paralimpiese deelnemersdorp in die ooste van Londen geneem en begin voorberei vir dié skouspel, waarvoor sowat 2,3 miljoen kaartjies reeds verkoop is.
Die Spele duur tot 9 September.
Die Britte het beloof dié Spele sal net so skouspelagtig wees soos die pas afgelope Spele in dieselfde stad.
Daar is Maandagaand in Sandton amptelik van die span afskeid geneem.
Die Olimpiese kampioen en wêreldrekordhouer Cameron van der Burgh was die gasspreker, terwyl die kanovaarder Bridgitte Hartley, ’n bronsmedaljewenner in Londen, ook daar was om die span sterkte toe te wens.
Van der Burgh het gesê die Paralimpiese span is ’n inspirasie vir die nasie en hy hoop die span doen goed.
Pieter Badenhorst, chef de mission (hoofspanbestuurder), het op sy beurt gesê die Paralimpiese span is aangespoor deur die goeie vertonings van die Olimpiese span.
Badenhorst, wat self as naelloper aan drie Paralimpiese Spele deelgeneem het, het gesê dit is baie moeilik om te voorspel hoeveel medaljes sy span dié keer sal huis toe bring.
“Die gehalte van Paralimpiese atlete word jaar ná jaar beter en die teenstand daarom al hoe beter.”
Buiten Pistorius en Du Toit, kan die atlete Fanie van der Merwe, Hilton Langenhoven en Teboho Mokgalagadi; die swemmers Charl Bouwer, Shireen Sapiro en Kevin Paul; Philippa Johnson (perdry) en die veteraan Ernst van Dyk (fietsry) ook hul stempel afdruk.
Gideon Sam, president van die SA Sportkonfederasie en Olimpiese Komitee (Saskok), het gesê hy hoop dat wanneer die vlam van die Paralimpiese Spele op 9 September geblus word, die vreugdevure in Suid-Afrika aangesteek sal word.