Proteas: Dié keer is ons reg vir Kiwi’s
2012-10-13 22:52
- Artikelopsies
- Deel
- Kry Rapport op
Die Suid-Afrikaanse netbalspan het vandag ’n steil bult om te klim wanneer hulle die wêreld se naasbeste span, Nieu-Seeland, in hul eerste toets van ’n Viernasies-reeks Doer Onder pak.
Maar, het die span se afrigter, Elize Kotze, die afgelope week gesê, dis ’n bult wat hulle met groot opgewondenheid en baie moed gaan aandurf.
Die Proteas het Maandag na Australië gevlieg vir die eerste ronde van die reeks, waarin hulle teen die wêreld se drie voorste spanne – Nieu-Seeland, Australië en Engeland – te staan kom.
Die tweede ronde vind later vandeesmaand in Nieu-Seeland plaas.
Die SA span pak die Kiwi’s vanoggend om 7:40 en het in hul voorbereiding heelwat geleun op die insae van hul kaptein, Amanda Mynhardt, wat amateur-netbal in Nieu-Seeland speel. Mynhardt het die afgelope week aan die webblad Netball Scoop gesê sy is danksy dié ervaring ’n beter speler as voorheen.
“Dit het my oë oopgemaak vir ’n heel nuwe wêreld,” het sy gesê. “As ek terugkyk na ’n jaar gelede en dit vergelyk met nou voel ek soos ’n veel beter speler. Terug in Suid-Afrika besef hulle ook dat die waardevolle ondervinding wat ek hier opdoen, gedeel kan word met my spanmaats by die huis.”
Mynhardt het gesê daar is ’n ongelooflike atmosfeer in die Protea-kamp. “Die meisies is so opgewonde en honger om op die baan te kom en te speel.”
Die laaste keer dat die Proteas teen Nieu-Seeland te staan gekom het, op verlede jaar se Wêreldkampioenskap, het hulle met 58-28 afgetjop. Vyftien maande later is hulle egter ’n ander span, danksy ’n seisoen wat heelwat hoogtepunte opgelewer het – vernaam belangrike seges oor Jamaika en Malawi.
“Ons was vir een kwart mededigend toe ons verlede jaar teen Nieu-Seeland gespeel het, maar ons wil graag glo dat ons intussen verbeter het en die wêreld nou baie warmer vir hulle kan maak,” het Kotze gesê.
Die wedstryd word vanoggend om 7:40 op SS6 en SSHD4 uitgesaai.