Proteas is tjok en blokvol ervaring
2012-01-28 23:14
MARIZANNE KOK IN JOHANNESBURG
Die mededinging om plekke in die nasionale vrouehokkiespan is nou so straf dat spelers met die ervaring van meer as 50 internasionale wedstryde onder dié is wat nie in die groep vir aanstaande maand se Olimpiese kwalifiseringstoernooi in Delhi ingesluit is nie.
Die nasionale afrigter, Giles Bonnet, het Vrydag die name van die 18 vroue wat die Groen en Goud in Delhi sal dra, aangekondig. Ingesluit in dié groep, wat teen Indië, Kanada, Italië, Pole en die Oekraïne te staan sal kom vir ’n plek in die Spele, is 11 Olimpiërs. Saam het die spelers 2 112 toetse op hul kerfstok – ’n gemiddeld van 117 wedstryde per speler.
Hulle is gekies uit 35 spelers wat oor die afgelope twaalf maande deel gevorm het van Bonnet se planne, en was sedert die begin van 2011 in meer as 100 toetse betrokke.
“Dit was ’n moeilike proses (om die groep te verklein, want elke speler is totaal toegewyd tot die opbou van SA hokkie, en daar is geen tekort aan entoesiasme nie,” het Bonnet gesê.
“Maar ons moes 18 spelers uitsonder op grond van hul huidige spelpeil – eerder as op talent en reputasie – en in die proses het spelers met meer as 50 toetse nie die jawoord gekry nie. Een van die spelers wat byvoorbeeld uitgelaat is, is ’n 22-jarige wat die derde vinnigste tot dusver by 50 wedstryde uitgekom het.”
Bonnet is vir die afgelope 18 maande in beheer van die nasionale span, en het sy spelers in dié tydperk behoorlik gedril om hulle gereed te kry vir die Olimpiese Spele.
Net in die afgelope jaar het hulle in die omgewing van 100 toetswedstryde gespeel, en het Bonnet ’n verbetering in die spelers se houding tot hul sport, hul selfvertroue en basiese vaardighede te weeg gebring.
Maar, het die afrigter Vrydag gesê, die span is hoegenaamd nog nie op die vlak wat hy vir hulle in die vooruitsig stel nie.
“Nee, beslis nie – ons is veel meer ambisieus as dit.
“Ons is byvoorbeeld vir die afgelope dekade tussen tiende en twaalfde op die wêreldranglys. Ons wil beter as dit hê.
“Ons het reeds baie werk ingesit, en ’n paar dinge het baie verbeter, maar ’n mens kan nie alles op een slag doen nie, en daar is steeds baie om te doen.”
Die afspraak in Indië is hul belangrikste sedert Bonnet die leisels geneem het – waarskynlik belangriker as die Spele self – maar die kaptein Marsha Marescia het die versekering gegee dat die spelers mekaar nou goed genoeg ken en nie in hul vermoë om te wen twyfel nie.
* Die groep vir Delhi is: Marsha Marescia (k), Mariette Rix, Vuyisanani Mangisa, Kate Woods, Lauren Penny, Shelley Russell, Dirkie Chamberlain, Lisa Deetlefs, Pietie Coetzee, Lesle-Ann George, Nicolene Terblanche, Lenise Marais, Kathleen Taylor, Bernadette Coston, Kim Hubach, Jade Mayne, Tarryn Bright, Sulette Damons.
* Die Proteas het die laaste fase van hul voorbereiding vir Delhi gister in Randburg met ’n sege met 1-0 oor Ierland afgeskop.
Pietie Coetzee het ’n strafdoel in die sewende minuut laat tel om die Proteas se drienasiesreeks teen Ierland en België op ’n hoë noot te begin.