Skadu oor mank Clijsters

Byna vier jaar ná Justine Henin se eerste uittrede is vroue-tennis steeds in dieselfde bootjie as in die maande onmiddelik daarna: daar is steeds geen duidelike gunsteling in enige toernooi nie.

Die Australiese Ope, wat môre in Melbourne begin, is geen uitsondering nie. Twee van die sterre – Kim Clijsters en Serena Williams – sukkel met beserings wat groot skaduwees oor hul vooruitsigte vir die toernooi werp.

Die res is steeds te onbestendig om met absolute vertroue te sê hulle sal minstens in die eindstryd wees – wat nog te sê die trofee omhoog hou.

Ná ’n jaar waarin Clijsters deur enkel- en maagspierbeserings buite aksie gehou is, het Australië (waar Kim ’n groot gunsteling is sedert sy in haar tienerdae met Lleyton Hewitt uitgegaan het) asem opgehou toe sy voorverlede week in Brisbane aan haar halfeindrondestryd moes onttrek weens ’n seer heup.

Die Belg is die verdedigende kampioen. Sy het die afgelope week gesê haar onttrekking in Brisbane was ’n blote voorsorgmaatreël.

“Met hierdie (besering) voel ek eintlik orraait,” het sy gesê.

“As alles goed uitdraai, behoort dit minder as ’n week te vat om gesond te word. Ek het gevoel my linkerheup raak stywer, tot die punt waar ek nie my bolyf vorentoe kon beweeg nie. Maar die slimste ding wat ek kon doen was om dit nie te lvererger nie en te probeer reg wees vir Melbourne.”

Williams se ousus, Venus, het onttrek aan die Aussie Ope, maar Serena sal nie, al is sy steeds nie seker oor die erns van die enkelbesering wat haar uit verlede week se Brisbane Ope gehou het nie.

“Die enkel voel beter. Ek vat dit dag vir dag,” het sy gesê.

“Dis steeds nie 100% nie, maar dis beter as wat dit was, en dis ’n treetjie vorentoe. Ek voel goed – definitief fikser as ooit in my loopbaan.”

Wat die res van die aanspraakmakers betref, moet die Wimbledon-kampioen Petra Kvitova, die Franse Ope-wenner Li Na en die Amerikaanse Ope-kampioen Samantha Stosur beslis dopgehou word.

Almal van hulle het ’n beter kans as die wêreld se voorste speler, Caroline Wozniacki, wat nog tot dusver nog nóóit in die majors beïndruk het nie.