Tennis: Twee gekeurdes uitgeboender
2012-01-21 22:56
Die vyfmalige Australiese Ope-kampioen Serena Williams het op oortuigende wyse tot die derde ronde van vanjaar se eerste Grand Slam-toernooi deurgedring, maar daar was gister trane ná twee van die voorste gekeurdes skok-nederlae gely het.
Williams het die wêreld se nommer 92-speler, Greta Arn van Hongarye, gister binne net 59 minute met 6-1, 6-1 vermorsel en daarmee ’n groot uitroepteken agter haar voorneme om ’n veertiende Grand Slam-titel Doer Onder te verower, geplaas.
Die 32-jarige Arn het haar en Williams se stryd in die Rod Laver-arena goed begin en ’n breekpunt in die heel eerste pot gehad, maar dit was die naaste wat sy ooit daaraan gekom het om Williams te laat sweet. Daarna het die Amerikaner haar voet op die petrol gesit en haar Hongaarse teenstander oordonder met haar kenmerkende kragspel.
“(Wat beserings betref) is ek nog nie naastenby waar ek graag wil wees nie, maar ek probeer daardeur speel,” het Williams, wat ’n groot deel van die 2011-seisoen weens beserings misgeloop het, gesê.
Williams sal in die volgende ronde te staan kom teen die ongekeurde Rus Ekaterina Makarova, wat gister teen die verwagtinge in met die sewende gekeurde, Vera Zvonareva, afgereken het.
Zvonareva het die baan in trane verlaat ná Makarova se oorwinning met 7-6 (9/7), 6-1.
Die ander opskudding van die dag is gelewer deur die Chinees Zheng Jie, wat met 6-3, 6-3 met die negende gekeurde, Frankryk se Marion Bartoli, klaargespeel het.
Haar sege beteken dat China twee verteenwoordigers in die vierde ronde sal hê. Li Na, wat verlede jaar in Melbourne tot die eindstryd deurgedring het en vier maande later die Franse Ope gewen het, het Vrydag reeds haar plek bespreek.
Die Wimbledon-kampioen, Petra Kvitova, en die voormalige Aussie Ope-kampioen Maria Sharapova het deur hul derderonde-wedstryde geseil.
Sharapova het die Duitser Angelique Kerber met 6-1, 6-2 oorrompel, terwyl Kvitova met 6-0, 1-0 baas was teen die Rus Maria Kirilenko, wat die handdoek weens ’n bobeenbesering ingegooi het.
Kvitova, wat deur baie kommentators as die volgende grote in vrouetennis beskou word, het met kragspel vorendag gekom waarop Kirilenko geen antwoorde gehad het nie.
Sy sal in die volgende ronde teen Ana Ivanovic te staan kom. Ivanovic het die Amerikaner Vania King met 6-4, 6-4 geklop.
- AFP